“Qonşu və dost ölkə olan Gürcüstan ilə Azərbaycan arasında siyasi, mədəni, iqtisadi və digər sahələrdə əlaqələrin inkişafı sürətlənmə tempində davam etməkdədir. Aprelin 6-da Tbilisidə Azərbaycan Respublikasının Prezidenti İlham Əliyevin Gürcüstanın Prezidenti Mixeil Kavelaşvili ilə təkbətək görüşü olub. Bu görüşün hər iki ölkə üçün böyük əhəmiyyət daşıdığı məlumdur”.
Bunu Mecra.az-a açıqlamasında siyasi şərhçi Tural İrfan deyib.
Onun sözlərinə görə, Azərbaycan-Gürcüstan ikitərəfli əlaqələrinin dostluq, mehriban qonşuluq və strateji tərəfdaşlıq prinsiplərinə əsaslandığı qeyd edilərək, əməkdaşlığın müxtəlif istiqamətlərdə, o cümlədən siyasi, iqtisadi, energetika, yaşıl enerji, nəqliyyat, sərmayələr və digər sahələrdə uğurla inkişaf etdiyi bildirilib:
“Müxtəlif səviyyələrdə qarşılıqlı səfərlərin münasibətlərimizin genişlənməsində roluna toxunulub. Hər iki ölkə arasında mövcud əlaqələrin daha səmərəli inkişaf etməsi, yeni töhfələr verməsi üçün bu görüşün zəruriliyi aydın olur. Habelə Azərbaycan ilə Gürcüstanın birgə həyata keçirdikləri nəqliyyat və enerji layihələrinin önəminin vurğulanması, onların strateji və iqtisadi əhəmiyyətinin qeyd edilməsi bir daha ölkələr arasındakı münasibətlərin dinamik inkişafını göstərir. Cənubi Qafqazda sabitliyin və təhlükəsizliyin təmin edilməsi baxımından Azərbaycanla Ermənistan arasında normallaşma prosesinin rolu Gürcüstan üçün də əhəmiyyətlidir. Regionda sülh və sabitlik şəraitinin davamlı olması birgə iqtisadi layihələrin icrasına da zəmin yaradır”.
Vasif ƏLİHÜSEYN
