ABŞ Prezidenti Donald Tramp özünün “Truth Social” hesabında Azərbaycan Prezidenti İlham Əliyevin IV Şuşa Qlobal Media Forumundakı çıxışına həsr olunmuş məqaləni paylaşıb.
“Qafqazinfo” xəbər verir ki, məqalə “Breitbart” nəşrində dərc olunub.
Məqalədə IV Şuşa Qlobal Media Forumunun açılış mərasimində çıxış edən İlham Əliyevin Trampı “sülh adamı” adlandırdığı, onun Azərbaycan ilə Ermənistan arasında tarixi sülh sazişinin əldə edilməsində həlledici rol oynadığını, Azərbaycan-ABŞ münasibətlərində misli görünməmiş yeni dövr açdığını vurğuladığı qeyd olunub.
Bildirilir ki, “Breitbart News”un müxbirinin sualını cavablandıran Azərbaycan Prezidenti ABŞ liderinin uğurunu uzunmüddətli münaqişələrin həllinə prinsipcə fərqli yanaşma nümayiş etdirməsinin şərtləndirdiyini qeyd edib.
“Azərbaycan Prezidenti sözlərinə görə, əvvəlki administrasiyalar təxminən otuz il ərzində Azərbaycan ilə Ermənistan arasındakı münaqişənin faktiki olaraq dondurulmasına gətirib çıxaran siyasət yürüdüblər, halbuki Tramp onun həllinə tamamilə fərqli mövqedən yanaşıb”, – nəşr yazıb.
ABŞ lideri paylaşıma heç bir şərh əlavə etməyib.
