Cəlilabad rayon Muğan kənd sakini, ikinci qrup Qarabağ əlili Qürbətov Bəxtiyar Verxuda oğlu Cəlilabad rayon icra hakimiyyətinin başçısı hörmətli Rafiq Cəlilov cənablarından kömək istəyib. B.Qürbətov Məcra.az-ın redaksiyasına ünvanladığı şikayət məktubunda yaşadığı küçənin yolunun bərbad vəziyyətə düşdüyü üçün gediş-gəlişin mümkünsüz olduğunu bildirib:
Hörmətli Rafiq müəllim!
Sizə bildirəm istəyirəm ki, mən Qürbətov Bəxtiyar Verxuda oğlu ikinci qrup Qarabağ əliliyəm. Ailəmi dövlətin mənə verdiyi əllilik pensiyasıyla dolandırıram. Hökumətimiz məni avtomobillə də təmin edib. Özüm isə yaşadığım Muğan kənd orta məktəbində gündüz gözətçisi işləyirəm. Siz rayonumuza icra başçısı təyin olunduğunuz gündən Cəlilabadda bir canlanma baş verib. Biz bunu öz gözlərimizlə müşahidə edirik. Rayonumuzda icra başçısı kimi fəaliyyətə başlayan kimi Göytəpə qəsəbəsində illərdir ki, su altında qalan naməlum şəhidlər məzarını təmir etdirdiniz. Bununla yanaşı, Cəlilabad Şəhidlər Xiyabanında da sizin göstərişinizlə yenidən təmir-quruculuq işləri aparıldı. Şəhidlərimizə verdiyiniz bu yüksək dəyərə görə sizə təşəkkürümü bildirirəm.
Hörmətli Rafiq müəllim!
Yaşadığım evdən mərkəzi yola qədər 150 metr məsafə var. Bu yolu isə dəfələrlə öz imkanlarım daxilində təmir etdirmişəm. Amma artıq maddi imkanım yoxdur. Qış aylarında yaşadığım küçənin yolunu yağış suları basır. Hər gün səhər məktəbə gedəndə məyus oluram. Təsəvvür edin ki, məktəbimizin direktoru da bu küçədə yaşayır. Yolu nə piyada, nə də maşınla getmək mümkündür. Yolda böyük çuxurlar əmələ gəlib və son günlər yağan intensiv yağışlar yolu keçilməz edib.
Yolun təmiriylə bağlı illərdir ki, Muğan kənd bələdiyyəsinə və icra nümayəndəsinə müraciət etsəm də, heç bir köməklik edilmir. Sizdən xahişim odur ki, adı çəkilən yolun təmir edilməsi üçün müvafiq göstəriş və tapşırıqlarınızı verəsiniz.
Öncədən sizə özüm və ailəm adından təşəkkür edirəm.
