Mecra.az Qəşəm Nəcəfzadənin gənc şair Həsən Kürün vaxtsız ölümünə həsr etdiyi şeiri təqdim edir:
De hansı şəhərdə, hansı kənddəsən,
De, hansı ağacın yarpağındasan?
De hansı yarpaqda sarısan, göysən?
Yoxsa şüşədəsən, pəncərədəsən,
Bəlkə yerdə deyil, təyyarədəsən?
Saat birdəsənmi, ikidəsənmi?
Bu gündə, sabahda, dünəndəsənmi?
Bakıda, Gəncədə, Şəkidəsənmi?
Metroda, küçədə, səkidəsənmi?
De hansı yağışın damlasındasan,
De hansı qəbirdə, hansı paltoda,
De hansı barmağın ucundasan de,
Yeddimdə, qırxımda, üçümdəsən, de?
Bəlkə yüz il əvvəl burda olmusan,
Bəlkə bu gün səhər çıxıb getmisən.
Bəlkə kim üçünsə sən tapılmısan,
Bəlkə kim üçünsə qəfil itmisən.