Mecra.az şair-jurnalist Vasif Əlihüseynin şeirlərini təqdim edir:
Darıxıram
Sənə xəyanət etdiyim gündən
milçəklər pəncərə toruna
dəyib qayıdan kimi
sənə gəlib-qayıdıram
Hardadı sənlə çay içəndə
ayağımı dişləyən
ağcaqanadlar?
sən gedəndən
fincanının dibində quruyub
kofenin sonu
İndi fincanının dibində
fala baxıram
Uzaqlardasan, uzaqlarda
Mən darıxıram axı
Aptekçi qız
Ağrılarımın sağalacağına dair
Bir məktub var əlimdə
Oxu, bu əndarbadi yazıları
Aptekçi qız
Bax gör dərd mənə
Dünyanın neçənci mərtəbəsindən
Baxır üzü aşağı
Sən dərmanları saydıqca
Ağrılarım keyişir
Barmaqlarım cibimi deşir
İçim bu kəmşirin dərmanları
Ağrıların sağlığına
Ata, at ol!
Yorğun gəlirəm işdən
Oğlum əllərimdən tutub ağlayır
ata, at ol.
Minib ev içində çapırlar məni
dördnala
Baxıram nə qəşəng yorğa gedirəm
Bircə nalım çatmır
Bu uzun yolu qət etməyə
Oğlum, halım çatmır
Yüküm şələ-şələdi
Bu hələ nədi ki,
Çəkdiyim yükün altında
Sən ağırlığın nədi ki
Salam, ata!
Nə Anam bu dünyadadı
Nə də atam bu şəhərdə
Zəng vururam Salam, ata!
Görürsən məni?
Burdayam anamın məzarı üstdə
Arada üç saatlıq təyyarə,
Üç günlük qatar yolu var
Qadınını itirmiş atamın
Siqaret tüstüsünün
Qoxusu gəlir burnuma
Darıxıram, ana, darıxıram.
Başımı dizinə qoymayan gündən
Başlayıb qulaq ağrılarım
Təkəm, anam, təkəm…
👁 3 baxış