2024-cü il dekabrın 24-də Azərbaycan Respublikasının Prezidenti, Milli Olimpiya Komitəsinin Prezidenti İlham Əliyevin iştirakı ilə 2024-cü ilin idman yekunlarına həsr olunan mərasim keçirilib. Mərasimdə Prezident İlham Əliyev geniş nitqlə çıxış edərək, Azərbaycan idmanının bu il əldə etdiyi uğurlara dair vacib fikirlər səsləndirib.
Prezident İlham Əliyevin bu çıxışı, həm ölkənin idman sahəsindəki inkişafını, həm də idmanın gənc nəslin vətənpərvərlik ruhunda yetişdirilməsindəki əhəmiyyətini vurğulayan mühüm bir çıxış olub. Ölkə başçımız vurğulayıb ki, Azərbaycan idmançılarının beynəlxalq arenada qazandıqları 1700-ə yaxın medal, ölkəmizin idman sahəsindəki gücünü və inkişafını aydın şəkildə nümayiş etdirir. Azərbaycan, bu nailiyyətlərlə, idman dövləti olaraq beynəlxalq yarışlarda öz mövqeyini daha da möhkəmləndirib.
Ən böyük idman hadisəsi olan 2024-cü il Yay Olimpiya Oyunlarında Azərbaycan tarixində ən yüksək nəticə əldə edilib. Prezident İlham Əliyev bu nəticənin qürurverici olduğunu vurğuladı. Çünki Azərbaycan, 200-dən çox ölkə arasında 30-cu yeri tutaraq, həm ölkənin idman potensialının artdığını, həm də müstəqillik dövründə qazandığı uğurların təzahürü olduğunu göstərir. Bununla yanaşı, Azərbaycan Olimpiya Oyunlarında müsəlman ölkələri arasında üçüncü yer tutaraq, tarixi bir nailiyyətə imza atdı.
Dövlətimizin başçısı həmçinin, gənc nəsil üçün idmanın vacibliyini vurğuladı. İdman yalnız fiziki inkişafı deyil, həm də vətənpərvərlik və milli birlik duyğularının formalaşdırılmasında mühüm rol oynayır. Azərbaycan idmançıları beynəlxalq arenada qalib ölkənin nümayəndələri kimi çıxış etdikdə, gənclər üçün böyük bir örnək göstərir. Bu, yalnız idman sahəsində deyil, həm də Azərbaycan cəmiyyətinin digər sahələrində müsbət təsir yaratmaq məqsədini güdür.
İdmanın inkişafı ilə bağlı dövlətin apardığı siyasət, Azərbaycanın güclü dövlət olmasının əlamətidir. Prezident İlham Əliyev, bütün idman sahələrində lazım olan qərarların verildiyini və federasiyaların, idman cəmiyyətlərinin vahid strategiya əsasında fəaliyyət göstərdiyini bildirdi. Bununla yanaşı, müxtəlif bölgələrdə, xüsusilə də Qarabağda yeni idman infrastrukturunun yaradılması və Olimpiya İdman Komplekslərinin inşası, Azərbaycanın idman sahəsindəki inkişafının simvoludur.
Ölkə başçımız çıxışında Azərbaycanın növbəti böyük idman hadisəsi olan MDB Oyunlarına ev sahibliyi edəcəyini qeyd etdi. Gəncə şəhərində keçiriləcək bu oyunlar, həm idman sahəsində yeni bir mərhələni, həm də Gəncə şəhərinin infrastrukturunun yenilənməsini əhatə edəcəkdir. Gəncə, bu oyunların mərkəzi olacağı üçün həm şəhər, həm də idman infrastrukturu əhəmiyyətli dərəcədə yenilənəcək və inkişaf edəcəkdir.
Son olaraq, Prezident İlham Əliyev, Azərbaycan idmanının gələcəyinə olan inamını ifadə edərək, idmançılarımıza və idman ictimaiyyətinə uğurlar arzuladı və onlara qarşıda gələn bayramlar münasibətilə xoş arzularını təqdim etdi. Onun çıxışı, Azərbaycan idmanının əldə etdiyi uğurları, gələcəkdəki inkişaf perspektivlərini və bu sahədə göstərilən dövlət dəstəyini əhatə edərək, ölkəmizin güclü və sabit bir dövlət olduğunu bir daha nümayiş etdirdi.
Seymur Yusibov,
Bakı şəhəri, Pirallahı rayonu, Y.Əliyev adına 235 №li tam orta məktəbin direktoru
👁 baxış