Xəbər verdiyimiz kimi Cəlilabad rayonunda küçələrdən biri Vətən müharibəsi şəhidi əsgər Qadir Ədalət oğlu Əsgərovun adına verilib.
Məcra.az xəbər verir ki, şəhidimizin atası Ədalət Heydərov bu diqqət və qayğıya görə Cəlilabad rayon icra hakimiyyətinin başçısı Rafiq Cəlilova öz minnətdarlığını bildirib:
“Allah bu işdə əməyi keçən hər kəsdən razı olsun. Cəlilabad rayon rəhbərliyi müsbət addım atıb. Mən şəhidlərə göstərdiyi diqqət və qayğıya görə rayon rəhbərliyinə təşəkkür edirəm. Bizim təsəlli yerimiz odur ki, övladlarımızın adı əbədiləşdirilsin, onlar daim xatırlansın”.
Onu da qeyd edək ki, Vətən müharibəsindən sonra Cəlilabad rayonunda Vətən müharibəsi şəhidləri Şəhriyar Əsgərovun, Tofiq Əmirlinin, Elçin İsmayılovun, İsa Kəlbiyevin adına küçə adları verilib.
Xatırladaq ki, Qadir Ədalət oğlu Heydərov 11 may 1998-ci ildə Cəlilabadın Əsədli kəndində anadan olub. Ailəsiylə Bakıda Mehdiabad qəsəbəsində yaşayıb. Vətən müharibəsində göstərdiyi qəhrəmanlığa görə ölkə başçısı tərəfindən “Vətən uğrunda”, “Qubadlının azad olunmasına görə”, “Cəbrayılın azad olunmasına görə” və “Cəsur döyüşçü” medallarıyla və “Vətənə xidmətə görə” 3-cü dərəcəli ordeni ilə təltif edilib. (Adalet.az)
Allah cəmi şəhidlərimizə rəhmət eləsin!
Vasif Əlihüseyn