“Müstəqilliyə gedən yol məhz Naxçıvandan başlamışdır”

Ümummilli liderimiz Heydər Əliyevin Azərbaycanda ikinci dəfə hakimiyyətə gəlişi dövlətimizin müstəqilliyini əbədi və dönməz etdi. Bu baxımdan, 1991-cü il sentyabrın 3-ü Azərbaycan xalqı üçün mühüm tarixi hadisə, müstəqil Azərbaycan dövləti üçün isə qurtuluşa gedən yolun ilk pilləsi idi. Naxçıvan sakinləri böyük səs çoxluğu ilə öz seçimini etdi və ulu öndər Heydər Əliyevi muxtar respublikanın Ali Məclisinin sədri seçildi. Həmin seçimlə nəinki Naxçıvanın, bugünkü qüdrətli Azərbaycan dövlətinin təməli qoyuldu.

Heydər Əliyevin gələcək fəaliyyəti üçün Naxçıvan dövrünün böyük əhəmiyyəti var. Xalq məhz Heydər Əliyevi özünə rəhbər seçdi, bu, demokratiyanın əsl təntənəsi idi. Ulu Öndər Heydər Əliyev Naxçıvanı işğaldan qorudu. Naxçıvanda ağır günlər davam edirdi, Naxçıvan tam blokadada idi. Naxçıvanın, ümumiyyətlə, gələcəkdə yaşaması ilə bağlı çox böyük təhlükələr var idi. Ulu Öndər Naxçıvanı qorudu və inkişaf etdirdi. Məhz Ulu Öndərin təşəbbüsü ilə Azərbaycan Xalq Cümhuriyyətinin üçrəngli Bayrağı Naxçıvan Ali Məclisinin sessiyasında Dövlət Bayrağı kimi təsis edilmişdir. Naxçıvan Muxtar Sovet Sosialist Respublikasının adından “Sovet Sosialist” sözləri çıxarılmışdır, Sovet İttifaqının və sonra artıq Rusiyanın hərbi birləşməsi olan motoatıcı diviziya Naxçıvandan çıxarılmışdır. Heydər Əliyev uzun illər ərzində xidmət etdiyi Sovet İttifaqı Kommunist Partiyasının sıralarından çıxmışdır və faktiki olaraq müstəqilliyə gedən yol Naxçıvandan başlamışdır.

Ulu Öndər Heydər Əliyevin 100 illik yubileyiilə bağlı Prezident İlham Əliyevin müraciətində deyildiyi kimi, məhz Ulu Öndər Heydər Əliyevin qətiyyəti, fəaliyyəti nəticəsində Naxçıvan torpaqları erməni işğalına məruz qalmadı. Azərbaycanda hakimiyyətdə olan qüvvələr hər vəchlə çalışırdı ki, Heydər Əliyev Naxçıvandan uzaqlaşdırılsın. Naxçıvan blokadada boğulurdu, xain qüvvələr isə Naxçıvana qarşı təxribatlar törədirdilər, desant göndərirdilər, çevrilişə cəhd edirdilər. Sanki istəyirdilər ki, Naxçıvan da işğal altına düşsün. Ancaq xalq buna imkan vermədi, öz lideri ətrafında sıx birləşmişdir.
Ulu Öndər Naxçıvan MR Ali Məclisinə rəhbərlik etdiyi dövr ərzində muxtar respublikanı zamanın ağır və sərt sınaqlarından çıxara bilmiş, onun gələcək inkişaf strategiyasını müəyyən etmiş və bu strategiyanın həyata keçirilməsi üçün mühüm addımlar atmışdır.Bu dövr Naxçıvan camaatının tarixinə Heydər Əliyev dövrü kimi əbədi həkk olunmuşdur. Xalqın mütləq əksəriyyətinin səsini qazanan Ulu Öndər dövlətə və xalqa sədaqət andı içərək Naxçıvanı böyük bəlalardan, faciələrdən hifz edib, bu bölgəni sabitlik, iqtisadi inkişaf və tərəqqi yoluna çıxartdı.

Ulu Öndər hələ Naxçıvan Muxtar Respublikası Ali Məclisinin sədri olarkən – 1990-cı il noyabrın 17-də Azərbaycan Xalq Cümhuriyyətinin üçrəngli Dövlət bayrağını Naxçıvan Muxtar Respublikasının dövlət bayrağı olaraq təsdiq etmiş, Azərbaycan SSR Ali Soveti qarşısında üçrəngli bayrağın Azərbaycanın rəsmi dövlət rəmzi kimi tanınması haqqında vəsatət qaldırmışdı. Ulu Öndər Azərbaycan rəhbərliyinə qayıdışı ilə ölkənin ictimai-siyasi, sosial, iqtisadi, elmi-mədəni həyatında, beynəlxalq əlaqələrdə əsl dönüş yaranmış, elmi əsaslara, beynəlxalq norma və prinsiplərə uyğun müstəqil dövlət quruculuğu prosesi başlanmışdır.

Şəhriyar Bayramzadə,

DSMF Cəlilabad rayon şöbəsinin əməkdaşı