28 oktyabr 2024-cü il tarixində Cəlilabad rayonu Günəşli kənd Əfilağa Həsənov adına 2 nömrəli tam orta məktəbində məktəbin məzunu olmuş şəhid polkovnik-leytenant Telman Miriyevin anım tədbiri keçirilib.
Məcra.az xəbər verir ki, tədbir Azərbaycan Respublikasının Dövlət Himninin səsləndirilməsi və şəhidlərin xatirəsinin yad edilməsi ilə başlayıb. Sonra şəhidin həyat yolu tədbir iştirakçılarının diqqətinə çatdırılıb.
Şəhidin qohumları, hərbçi yoldaşları, müəllimləri, şəhid valideynləri və kənd ağsaqqalları çıxış edərək şəhid zabit Telman Miriyevin igidliyindən, fədakarlığından, keçdiyi qəhrəmanlıq yolundan danışıblar.
Şagirdlər şəhidlərə həsr olunmuş şeirlər səsləndirib, kompazisiya nümayiş etdiriblər. Tədbirdə şəhidin qızı Zeynəb Miriyeva çıxış edərək tədbiri təşkil edənlərə və iştirakçılara təşəkkür edib, atasının həyat yolundan bəhs edən kitabları məktəbə bağışlayıb.
Tədbirdən sonra iştirakçılar və kənd əhalisi şəhid Telman Miriyevin məzarını ziyarət ediblər.
Xatırladaq ki, polkovnik-leytenant Telman Mirbaba oğlu Miriyev 1981-ci il iyulunn 19-da Cəlilabad rayon Günəşli kəndində anadan olub. 2016-cı ilin aprel döyüşlərinin fəal iştirakçısı olan T.Miriyev ölkə başçısı tərəfindən “Vətən uğrunda” medalı ilə təltif edilib. O, 2016-cı il oktyabrın 27-də hərbi poliqonların birində təlim zamanı təhlükəsizlik qaydalarının pozulması nəticəsində şəhid olub.
Uğur
