“Təbrikiniz üçün çox sağ olun. İlləri yavaş-yavaş yola veririk. Yaş mənim üçün rəqəm olaraq artıq, ruhum isə hələ ki, yaxşıdır. Əsas həyatda can sağlığıdır, o olmayandan sonra həyatın mənası yoxdur”
Bunu Adalet.az-a açıqlamasında bu gün doğum günü olan xanəndə Sabir Abdullayev deyib. Xanəndə qırx ildir ki, muğam sənətinə xidmət etməsinə baxmayaraq ona qarşı olan diqqətsizlikdən də gileylənib:
“Əsas məsələ elə mənə qarşı olan diqqətsizlikdir. Qırx ildən çoxdur ki, muğam sənətinə xidmət edirəm. Onun 38 ilini muğam müəllimi kimi işləmişəm. Bakı şəhərində musiqi məktəblərində ilk olaraq muğam müəllimi kimi bu işə mən başlamışam. Məndən sonra muğam müəllimlərinin sayı artıb. Yəni bu sahəni inkişaf etdirmişəm. İndi Allaha şükür bütün musiqi məktəblərində muğam müəllimləri çalışır. Sadəcə olaraq bir az unudulduq.
İndi 11-nömrəli Musiqi məktəbində muğam müəllimi işləyir. Ötən il Asəf Zeynallı adına musiqi kollecindəki işimdən ayrıldım, iki il orda işlədim. Sonra Sumqayıtda məktəbdə musiqi müəllimi işləmişəm. Hara getmişəmsə elə bilki yıxılan dirəyi qaldırmışam və sonra ordan da başqa yerə getmişəm. Mən sanki fövqəladə hallar nazirliyinin əməkdaşı olmuşam. Tələbələrim də ki, göz qabağındadır”.
Xanəndə fəxri adla bağlı dəfələrlə müraciət etdiyini bildirib:
“Keçmiş mədəniyyət nazirlərinin vaxtında yeddi dəfə təqdimatım gedib. Mən işləyən dövrdə beş nazir dəyişib. İndi Adil Kərimli mədəniyyət naziri təyin olunub. Deyirlər ki, yaxşı adamdır. Hamısı mənə deyib ki, sənə fəxri ad düşür, siyahıda adın var. Mən də oturub gözləmişəm. Elə adam deyiləm ki, hər gün gedib qapı döyəm. İndi yaş həddi gəlib çatıb və o fəxri adlarım olmadığına görə məni işlədiyim məktəblərdən uzaqlaşdırırlar. Mənə əsas mane olan da elə budur.
Ancaq başımı aşağı salıb işimi işləmişəm və ona görə də fəxri ad almağın marağında olmamışam. Bir dənə 24 nəfər Qarabağ xanəndələrinin diskində mənim də ifam yer alıb. Bu disk Heydər Əliyev Fondu tərəfindən hazırlanıb. Elə mənim haqqımda nəsə bilmək üçün o disk bəs edir. Tələbələrimdən biri Güllü Muradovadır, Xalq artisti Samir Cəfərov da gimnaziyada mənim sinifimdə oxuyub. Muğam müsabiqələrində 20-liyə mənim tələbələrimdən 5-6 nəfər düşürdü. Sonra orda da məni küsdürdülər və uzaqlaşdım, həvəsdən düşdüm.
Sabir Abdullayev muğam müəllimi kimi bir çox ölkələrdə Azərbaycanı təmsil etdiyini deyib:
“Əslində Vahid Abdullayev də fəxri ad almadan dünyadan getdi. Cabir Abdullayevin yolu başqadır. Mənim başım müəllimliyə qarışdı. Müəllimlik elə bir çuxurdur ki, ora düşdün çıxmaq olmur. Dünyanın ən böyük ölkələrində olmuşam. Hərdən bir fəxri ad məsələmi soruşurdum və cavablarında bildirirdilər ki, tədbirlərdə olmursan deyə fəxri ad vermirik. Deyirdim ki, Amerika, Kanada, Braziliya, İngiltərə kimi ölkələrə dövlət xəttiylə getmək tədbir sayılmır?! Gərək gedib bulvarda oxuyam?! Dövlətin tədbiri burda yox, xaricdə olur. Heç kimin xətrinə dəyməmişəm, amma mənə qarşı çox böyük haqsızlıq ediblər. İndi Adil müəllim nazir təyin olunandan sonra zəng vurub mənimlə maraqlanıblar. Amma bilmirəm necə olacaq. Mənim problemlər çoxdur. Muğam sənətinə ömrümü, enerjimi vermişəm.
Birinci Qarabağ savaşı zamanı səngərlərdə konsertlərim olub. Hərbi formada, silahla, qavalla Laçının Güləbird kəndindən Ağdərəyə kimi getmişəm. Gədəbəydə cəbhə bölgəsində konsert verəndə ermənilər minamyotla atəş tutdular və birtəhər bizi ordan çıxardılar. Mən dövlət adamıyam, ona xidmət edirəm”.
Vasif Əlihüseyn