Xəbər verdiyimiz kimi Azərbaycan Ordusunun iki əsgəri-Axundov Hüseyn Əhliman oğlu və Bəbirov Aqşin Qabil oğlu Ermənistanda itkin düşüb.
Adalet.az-ın əməkdaşı Abşeron rayonun Mehdiabad qəsəbəsində Hüseyn Axundovun ailəsinə baş çəkib. H.Axundovun anası Şəlalə xanım və qardaşı Böyükağayla görüşüb.
Şəlalə xanım övladının səhhəti və harda olmasıyla bağlı dəqiq məlumat istədiyini deyib:
“Hüseynlə aprelin 4-də danışdıq. Özüm xəstə olsam da oruc tuturam. Aprelin 6-da axşam yatıb yuxuda gördüm ki, Hüseyn məndən su istəyir. Mən də ona su verdim və doyunca içdi. O yuxudan sonra səhərə qədər gözümə yuxu getmədi. Qalxıb sübh namazımı qıldım. Amma səhər açılana qədər dedim ki, görən balama nə olub ki, yuxuda məndən su istədi. Durub yuxumu qonşuya danışdım dedi ki, aydınlıqdı. Aprelin 7-də Hüseynin itkin xəbərini aldıq. İki gün öncə isə videosu yayıldı.
İndi elə Baş Prokurorluqdan gəlirəm. Həmin gündən indiyə kimi hər yerə getmişik. Dövlət qurumlarından ancaq deyirlər ki, gözləyin xəbər alan kimi sizə deyəcəyik. İstəyirəm ki, səsim Cənab Prezident İlham Əliyevə və Birinci xanım Mehriban Əliyevaya çatsın. Oğlumun harda və sağ olmasıyla bağlı xəbər istəyirəm”.
Hüseynin qardaşı Böyükağa deyib ki, onun hərbi hissədə incidilməsinə inanmırıq:
“Hüseyn dekabrda məzuniyyətə gəlmişdi. Özüm də Beyləqanda işləyirdim və bu xəbəri alandan sonra işdən də çıxdım və evdə ailəmin yanındayam. Paşinyan çıxışı zamanı dedi ki, Azərbaycan əsgərlərini guya hərbi hissədə incidiblər və onlar da qaçaraq biz tərəfə keçiblər. Amma biz buna inanmırıq. Qardaşım 13 ayın əsgəri idi, xidmətini başa vurmağa beş ayı qalmışdı. Onun kiminsə incitməsi inandırıcı deyil. İnanırıq ki, dövlətimiz həm qardaşım Hüseyni, həm də onunla birlikdə əsir düşən Aqşin Bəbirovu əsirlikdən azad edəcək”.
Vasif Əlihüseyn