Qax rayonunun Marsan kəndində illərdir mal-qara otarılan ərazinin əkin sahəsinə çevrilməsi sakinlərin narazılığına səbəb olub.
Mecra.az Xəzər TV-yə istinadən xəbər verir ki, kənd sakinlərinin sözlərinə görə, sözügedən ərazi təkcə bir neçə ailənin deyil, bütün kəndin əsas dolanışıq mənbəyidir.
Sakinlərin iddiasına görə, ərazi şumlandıqdan sonra ətrafına çəkilən dərin kanal vəziyyəti daha da gərginləşdirib. Hazırda heyvanların həmin əraziyə keçməsi qeyri-mümkündür. Bu isə kənddə maldarlıqla məşğul olan ailələri çətin vəziyyətdə qoyub.
Kəndlilər məsələ ilə bağlı aidiyyəti qurumlara, o cümlədən Qax Rayon İcra Hakimiyyətinə dəfələrlə müraciət etsələr də, hələlik konkret bir nəticə əldə olunmayıb.
Məsələ ilə bağlı kənd bələdiyyəsindən bildirilib ki, ümumi sahəsi 18 hektar olan ərazinin yalnız dörd hektarı əkin üçün istifadə olunur. Sakinlər isə aidiyyəti qurumların problemə qısa zamanda aydınlıq gətirəcəyinə və otlaq sahəsinin əvvəlki statusunun bərpa olunacağına ümid edirlər.
