Məktəbəqədər və Ümumi Təhsil üzrə Dövlət Agentliyinin “Valideyn konfranslarının təşkili və keçirilməsi qaydaları üzrə təlimat”ına uyğun olaraq 16 dekabr 2025-ci il tarixində Cəlilabad Rayonu Polis Şöbəsinin əməkdaşının, Cəlilabad rayonu üzrə təhsil sektorunun əhatə dairəsində fəaliyyət göstərən ümumtəhsil məktəblərinin rəhbərlərinin, UBTR-nin, psixoloqların, məktəb valideyn komitəsinin sədr və üzvlərinin, sektorun əməkdaşlarının iştirakı ilə “Məsuliyyətli davranışın və özünənəzarət bacarıqlarının formalaşdırılması” başlığı altında “Rəqəmsal təhlükəsizlik və onlayn mühitdə uşaqların qorunması” mövzusunda valideyn konfransı təşkil edilib.
Mecra.az xəbər verir ki, konfrans torpaqlarımızın azadlığı və suverenliyi uğrunda canlarını fəda etmiş şəhidlərimizin əziz xatirəsini yad etməklə, Azərbaycan Respublikasının Dövlət Himninin oxunması ilə başlanıb. Konfransın əsas məqsədi müasir dövrdə uşaqların rəqəmsal mühitdə üzləşə biləcəyi risklər barədə valideynləri məlumatlandırmaq, onlayn davranış mədəniyyətinin aşılanmasında ailənin rolunu ön plana çıxarmaq və uşaqların təhlükəsizliyinin təmin olunması istiqamətində vahid yanaşmanın formalaşdırılması, məktəb və məktəbəqədər təhsil müəssisələri ilə ailə arasında əməkdaşlığı gücləndirməklə uşağın hərtərəfli inkişafını təmin etmək, həmçinin valideyn iştirakını sistemli şəkildə təşviq etmək olmuşdur.
Tədbir zamanı aşağıdakı mövzular ətrafında geniş müzakirələr aparılmışdır: uşaqların internetdən və sosial şəbəkələrdən düzgün və təhlükəsiz istifadəsi; yaşa uyğun olmayan məzmunlardan qorunma yolları; onlayn asılılığın qarşısının alınması və ekran vaxtının düzgün tənzimlənməsi; kibertəhlükələr, şəxsi məlumatların qorunması və rəqəmsal etik davranış qaydaları; valideyn nəzarətinin və ailədaxili ünsiyyətin əhəmiyyəti. Konfrans zamanı vurğulanmışdır ki, uşaqlarda məsuliyyət və özünənəzarət bacarıqlarının formalaşması yalnız məktəbin deyil, ilk növbədə ailənin də üzərinə düşən mühüm vəzifədir. Valideynlərin uşaqlarla açıq dialoq qurması, onların onlayn fəaliyyətlərinə maraq göstərməsi və düzgün nümunə olması təhlükəsiz rəqəmsal mühitin yaradılmasında həlledici rol oynayır.
Tədbirin sonunda valideynlər arasında mövzuya uyğun olaraq anonim sorğu keçirilmiş, valideynləri maraqlandıran suallar cavablandırılmış, mövzu ilə bağlı tövsiyələr verilmiş və gələcəkdə bu istiqamətdə maarifləndirici tədbirlərin davam etdirilməsinin vacibliyi qeyd olunmuşdur. Uşaqların təhlükəsiz gələcəyi üçün məsuliyyətli və məlumatlı valideynlik əsas şərtdir!
Vasif ƏLİHÜSEYN
