Niyazi haqqında bu yazını yazmağı, onu hər il doğum və anım günlərində xatırlamağı özümə borc bilirəm. Çünki onunla 2016-cı il Şanlı aprel döyüşlərindən sonra müalicə aldığı “Papanin” hospitalında görüşüb tanış olmuşduq. Ondan sonra tez-tez əlaqə saxlayırdı, hal-əhval tuturdu. Bir sözlə, diqqətcil adam idi.
“Niyazi qarın nahiyyəsindən güllə yarası alaraq ağır yaralanır…”
O, 1982-ci il oktyabrın 13-də Mingəçevir şəhərində anadan olub, yəni bu gün Niyazinin doğum günüdür. Ailə qurduqdan sonra 2014-cü ildən müddətdən artıq hərbi qulluqçu kimi ordu sıralarında xidmətə başlayıb. 2015-ci ildə Ağdamda xidmət edərkən düşmən həmin istiqamətdə həmişə olduğu kimi təxribata cəhd edir. Düşmənin bu hiyləsinin qarşısını almaq üçün yenə ön sıralara atılan Niyazi qarın nahiyyəsindən güllə yarası alaraq ağır yaralanır. Əməliyyat olunub, sağaldıqdan sonra yenidən ordu sıralarına qayıb xidmətini davam etdirir.
“Murad adlı əsgəri və Niyazi isə yaralanır…”
Bir il sonra isə 2016-cı ilin dörd günlük Şanlı aprel döyüşləri başlayır. Niyazi yenə döyüş meydanında öz canını gözə almayaraq düşmənin üstünə irəliləyir. Aprelin 2-də düşmən Talış kəndi istiqamətində minaatandan atəş açır və ard-arda iki mərmi Niyazinin və əsgərlərinin düz yanına düşür. Həmin vaxt Niyazinin əsgərləri Müşfiq Orucov, Əlizaman İslamov və Nurlan Qasımov qəhrəmancasına şəhid olurlar. Murad adlı əsgəri və Niyazi isə yaralanır. Amma o, yaralı olmasına baxmayaraq Muradı döyüş meydanından çıxara bilir. Onları hospitala yerləşdirirlər.
Aprel döyüşlərindən sonra Niyazi ordu sıralarından tərxis olunur. Bu illər ərzində o, sosial problemlərin içində çabalasa da, bir gün də olsun ruhdan düşmür. İki oğlu və həyat yoldaşı ilə Mingəçevirdə birotaqlı yataxnada yaşadığını təəssüf hissiylə vurğulayan Niyazi, yenə vətənin dar günündə döyüşlərə qatılır. Onunla söhbətimiz zamanı mənzillə təmin olunmasını da işıqlandırmışdıq.
44 günlük Vətən müharibəsi zamanı isə Niyazi bədənində 40 qəlpə, 152 tikiş yarası olmasına baxmayaraq könüllü döyüşlərə qatılır. Suqovuşan uğrunda gedən ağır döyüşlər zamanı sentyabrın 30-da sinəsindən ağır güllə yarası alsa da, özünə keyləşdirici iynə vuraraq döyüşə davam edir. Amma oktyabrın 11-də düşmən tərəfindən atılan ikici güllə onu şəhidlik zirvəsinə ucaldır. Niyazi qəhrəmancasına şəhid olur.
Niyazinin nəşini Mingəçevir Şəhidlər Xiyabanında böyük izdihamla dəfn edirlər. Həmişə bu xiyabanda şəhid yoldaşlarını ziyarət edən Niyazi, bəlkə də bir gün orda uyuyacağını özü də bilirdi. Bir sözlə, Niyazi öz canındakı ağrıları bir yana qoyub, vətəni, torpağı, onun uğrunda ölməyi seçdi.
Bu qəhrəmanlıqlarına görə Niyazi İsgəndərov ölümündən sonra ölkə başçısı tərəfindən “Vətən uğrunda” və “Laçının azad olunmasına görə” medalları ilə təltif olunub.
Bu gün isə Niyazinin ailəsi dövlətimiz tərəfindən mənzillə təmin olunub.
Doğum günün mübarək, rahat uyu, şəhid qardaşım
Moderator.az
Vasif Əlihüseyn
