Görüşün məqsədi 2026-2027-ci tədris ilində keyfiyyət fəaliyyət planının icra vəziyyətini müzakirə etmək, tədrisin keyfiyyətinin yüksəldilməsi istiqamətində qarşıda duran vəzifələri müəyyənləşdirmək olub.
Mecra.az xəbər verir ki, görüşdə Lənkəran-Astara Regional Təhsil İdarəsinin Tədrisin keyfiyyəti sektorunun müdiri Namiq Aslanov, Cəlilabad rayonu üzrə təhsil sektorunun müdiri İlkin Zeynalov, sektor əməkdaşları və ümumtəhsil müəssisələrinin rəhbərləri iştirak ediblər.
Müzakirələr zamanı keyfiyyət fəaliyyət planının icrası ilə bağlı cari məsələlər, həmçinin IV, VI və IX siniflər üzrə ötən tədris ilinin nəticələri təhlil olunub. Nəticələrdən irəli gələn ehtiyaclar, şagirdlərin çətinlik çəkdiyi istiqamətlər və aşkar edilmiş boşluqların aradan qaldırılması üçün nəzərdə tutulan tədbirlər müzakirə olunub. Bu çərçivədə tədris prosesində müvafiq təkmilləşdirmələrin aparılması, müəllimlərə metodiki dəstəyin gücləndirilməsi və şagirdlərin təlim nəticələrinin yüksəldilməsi istiqamətində atılacaq addımlar diqqətə çatdırılıb.
