Azərbaycan Bələdiyyələrinin Milli Assosiasiyaları tərəfindən hazırlanmış “E-Bələdiyyə” mobil tətbiqi istifadəyə verilib.
Tətbiq Azərbaycan Respublikasında rəqəmsal inkişafın sürətləndirilməsi istiqamətində icra edilən tədbirlər çərçivəsində bələdiyyə xidmətlərinin əlçatanlığının təmin edilməsi məqsədilə yaradılıb.
“E-Bələdiyyə” tətbiqi vətəndaşlara bələdiyyə orqanına getmədən daha çevik, şəffaf bələdiyyə xidmətlərindən istifadə etməyə imkan verir və bələdiyyə-vətəndaş münasibətlərini yeni müstəviyə keçirir.
Vətəndaşlara yerli vergi öhdəliklərini tətbiq vasitəsilə izləmək, ödəniş etmək və bələdiyyə ilə elektron əlaqə saxlamaq imkanı təqdim edilir.
Tətbiqdən ödəniş əməliyyatının nəticəsinə baxmaq, ödəniş qəbzini əldə etmək və əvvəlki ödənişləri izləmək mümkündür. Əmlak və torpaq vergisi kalkulyatoru isə sahə, zona və obyektin növü üzrə ilkin hesablama aparmağa imkan verir.
“E-Bələdiyyə” tətbiqini həm “App Store”, həm də “Google Play”dən yükləmək mümkündür. İstifadəçilər “mygov İD” sistemi vasitəsilə qeydiyyatdan keçərək elektron kabinetlərinə daxil olmaqla tətbiqdən istifadə edə biləcəklər.
Yaxın gələcəkdə “E-Bələdiyyə” mobil tətbiqində digər bələdiyyə xidmətlərinin dairəsinin genişləndirilməsi və məlumatların “MyGov” platformasına da inteqrasiya edilməsi nəzərdə tutulur.
Aşağıdakı keçidlərdən istifadə etməklə mobil tətbiqi yükləmək olar:
https://play.google.com/store/apps/details?id=com.icisleri.belediyemobileapp&pcampaignid=web_share
https://apps.apple.com/tr/app/e-b%C9%99l%C9%99diyy%C9%99/id6815845101?l=tr