Məcra.az “Qadın taleyi” rubrikasında növbəti qadının həyat hekayəsini təqdim edir.
Bu dəfə sizə Yağmurun həyat hekayəsini təqdim edəcəyik. O, həyat yoldaşı Rusiyaya getdikdən sonra gözünün ağı-qarası tək oğlunu da itirib. Yağmur olanları belə nəql edib:
“Ailədə iki qardaş və iki bacıyıq. Evin ilk övladı mənəm. Ailə həyatı qurduqdan sonra bir müddət xoşbəxt yaşasaq da, həyat yoldaşım işləmək üçün Rusiyaya getdi. Onunla rəfiqəmin vasitəsilə tanış olmuşduq. Onda artıq oğlum Hüseyn dünyaya gəlmişdi. Neçə illər onun yolunuzu gözləsəm də sonunda anladım ki, o, birdəfəlik məni tərk edib”.
“Bu gün də məzarı qibləgah yerimdir…”
“Övladım böyüdü və artıq birinci sinifdə oxuyurdu. Bina evində qaldığımız üçün bir gün pilləkəndən düşəndə uşaq yıxıldı. Onu dərhal xəstəxanaya çatdırdıq. Həkimlər əməliyyat edərək bildirdilər ki, artıq həyatı üçün heç bir təhlükə yoxdur. Amma sən demə daxildən qanaxma olub. Səhəri gün Hüseyn dünyasını dəyişdi. Bu mənim həyatımın ən böyük itkisi idi. Onu böyük izdihamla dəfn etdik. Bu gün də məzarı qibləgah yerimdir”.
“Övladımın itkisiylə heç cür barışa bilmirdim…”
“Bütün bunlara baxmayaraq həyat yoldaşım uşağın dəfninə də gəlmədi. Sonradan öyrəndim ki, o, Rusiyada evlidir. Ondan sonra mən bir müddət depressiyaya düşdüm. Övladımın itkisiylə heç cür barışa bilmirdim. Amma bir adamla tanış oldum və bu dostluq sonradan sevgiyə çevrildi. Deyir dərd paylaşılanda azalar və onunla bu təkliyimi, itkimi paylaşıb həyatıma davam etdim. Düşünürəm ki, başıma gələnlər həyatımda etdiyim səhvlərə görə oldu”.
“Fikirləşdim ki, etdiyin heç bir haqsızlıq cəzasız qalmır…”
“Bu vaxta qədər çox özümdən deyirdim. Qardaşım həyat yoldaşına zülm edirdim. Böyük qardaşım iki dəfə ailə qurdu və sonra boşandı. Hamısına da səbəbkar biz baldızlar idik. Gəlinə zülm edirdik və bəlkə də onun ahı tutdu məni. Bu hadisələrdən sonra özümü yığışdırdım. Fikirləşdim ki, etdiyin heç bir haqsızlıq cəzasız qalmır. Məndən kiçik bacım da boşandı və indi də peşmandı. Onun da boşanmsına səbəbkar atam oldu. Atamla kürəkənimiz mübahisə etdi və sonra atam bacımı məcbur etdi ki, ondan boşan. Boşandılar və indi iki oğluyla ayrı yaşayır. Amma heç kimə məsləhət görmürəm ki, ailəsi dağılsın”.