“Bağçada körpələrə işgəncə verən canavar “müəllimləri” görəndə, yaxşını görməməzlikdən gələn cəmiyyətdə yaşadığımın səbəbini bir daha anladım”.
Mecra.az xəbər verir ki, bu sözləri Xalq artisti Brilliant Dadaşova yazıb. Müğənni bir neçə gündür gündəmdən düşməyən “Mehnur” loqopedik reabilitasiya mərkəzində azyaşlılara işgəncə verilməsi məsələsinə münasibət bildirib.
Dadaşova oğlunun görüntüsünü yayımlayaraq, onun tələbələr üçün yaratdığı proqramdan da bəhs edib. O, oğlunun işindən çox, qalmaqallı açıqlamaları ilə gündəmə gəlməsinə reaksiya verib:
“Cahadın gənclərimizə yardım məqsədiylə icad etdiyi ödənişsiz test proqramına görə müəyyən qruplaşmalar tərəfindən hər addımının təhqir edildiyi cəmiyyəti yaradanlar da, həmin kateqoriyadan olanlardır”.
Qeyd edək ki, sosial şəbəkələrdə Nizami rayonunda yerləşən “Mehnur” loqopedik reabilitasiya mərkəzində azyaşlılara işgəncə verilməsi ilə bağlı görüntülər yayılıb.
Daxili İşlər Nazirliyi tərəfindən müvafiq araşdırma aparılıb və mərkəzin direktoru Nuranə Hacızadə, mərkəzin psixoloqu Aytac Kazımlı və mərkəzin direktor köməkçisi vəzifəsində çalışan Səbinə Əliyarbəyli saxlanılıb. Saxlanılan şəxslər barəsindən Cinayət Məcəlləsinin 133.2.1, 133.2.3 və 133.2.4-cü (əzab vermə) maddəsi ilə cinayət işi başlanılıb. Axşam.az