Tovuzda ölümlə nəticələnən ağır yol-nəqliyyat hadisəsi baş verib.
Məcra.az xəbər verir ki, “Mercedes” və “VAZ” markalı maşınların toqquşması nəticəsində ilkin məlumata əsasən 6 nəfər ölüb.
Hələ ki, ölənlərin şəxsiyyəti müəyyən edilməyib (qafqazinfo.az).
Oxu.az-ın məlumatına görə, qəzada ölənlərdən 5 nəfəri hərbçidir.
***
Fövqəladə Hallar Nazirliyi qəza ilə bağlı məlumat yayıb.
Bildirilib ki, hadisə yerində əməliyyat şəraiti qiymətləndirilərkən “MERCEDES” markalı minik avtomobili ilə “VAZ 2106” markalı minik avtomobilinin toqquşması nəticəsində yol-qəza hadisəsinin baş verdiyi və deformasiyaya uğramış nəqliyyat vasitələrində sıxılı vəziyyətdə qalanların olduğu müəyyən olunub.
Xilasedicilər xüsusi vasitələrin köməyi ilə “MERCEDES” markalı minik avtomobilində sıxılı vəziyyətdə qalan yeniyetməni xilas edərək təcili tibbi yardım briqadasına təhvil veriblər.
Yol-nəqliyyat qəzası zamanı həyatını itirmiş altı nəfərin meyiti aidiyyəti üzrə təhvil verilib.
Yanğınsöndürənlər tərəfindən ərazidə zəruri təhlükəsizlik tədbirləri görülüb.
Hadisə ilə əlaqədar müvafiq qurumlar tərəfindən təhqiqat aparılır.
***
TƏBİB-dən “Qafqazinfo”ya verilən məlumata görə, baş vermiş ağır yol-nəqliyyat hadisəsi nəticəsində xəsarət alan 2011-ci il təvəllüdlü şəxs (kişi cinsli) saat 20:40 radələrində aqonal vəziyyətdə Tovuz Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub.
Başın, döş qəfəsinin, bədənin müxtəlif nahiyələrinin qapalı və açıq zədələnməsi diaqnozu ilə ona zəruri tibbi yardım göstərilib və pasiyent əməliyyata alınıb. Hazırda vəziyyəti ağır qiymətləndirilir.
