Bu gün noyabrın 20-si Ağdam Şəhəri Günüdür. Şair Vasif Əlihüseyn şair dostu Qulu Ağsəsi doğma rayonu Ağdamın işğaldan azad edilməsi münasibəti ilə təbrik edib və bu münasibətlə şeir yazıb.
Məcra.az həmin şeiri təqdim edir:
Gözünün qarası da
ağı da aydın
Ağdama qayıdın,
qayıdın, sizə qayıdan Ağdama
altı yaşımda işğal olunan o rayonu
ayağıyalın qadının gəlişiylə xatırlayıram
ürəyinizə otuz illik nisgilin
sevinci dama-dama
qayıdın, sizə qayıdan Ağdama
şəhərin girişində
şeh tutmuş eynəyini çıxar gözündən
köynəyinin ətəyinə sil
oba-oba, nəsil-nəsil
qayıdın, sizə qayıdan Ağdama
gözlərini ver şəhərin havasına
qol qaldır, oyna
uçmuş evlərin, qəbirlərin yasına
bu qalibiyyət, bu qovuşmaq dünyasına
xoş gəlmisiz!
qayıdın, sizə qayıdan Ağdama.
👁 baxış