Cəlilabad rayonunun Muğan kəndində şəhid Ramazan Hüseynzadənin xatirəsini əbədiləşdirmək üçün adına küçə verilib.
Məcra.az xəbər verir ki, şəhidin anım günündə bununla bağlı tədbir keçirilib.
Mərasimdə şəhidin ailə üzvləri, rayon rəsmiləri, döyüş yoldaşları və ictimaiyyət nümayəndələri iştirak ediblər.
Tədbirdə çıxış edənlər dövlətimizin şəhid ailələri və qazilərə göstərdiyi qayğıdan söz açıb, şəhid Ramazan Hüseynzadənin döyüş yolu və Vətən müharibəsində göstərdiyi igidlik barədə danışaraq onun fədakarlığını vurğulayıblar.
Şəhidin atası Həmdulla Hüseynov təşəbbüskarlara və tədbir iştirakçılarına təşəkkürünü bildirib, oğlunun vətənə, millətə olan sevgisindən danışıb.
Daha sonra kəndin mərkəzində şəhid Ramazan Hüseynzadə və onun əmisi şəhid Hilal Hüseynovun xatirəsinə inşa edilmiş bulaq kompleksinin açılışı olub.
Qeyd edək ki, şəhid Ramazan Hüseynzadə 20 sentyabr 2023-ci ildə lokal xarakterli antiterror əməliyyatları zamanı qəhrəmancasına şəhid olub. Şəhid Hüseynzadə Ramazan Həmdulla oğlu ölümündən sonra “Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilib (azərtac.az).
