Qlobal kartof bazarı son bir neçə ildə kəskin böyüyüb. Kartof istənilən iqlim və şəraitdə böyüyə bilər. Onların böyüməsi üçün daha az vaxt tələb olunur, digər tərəvəzlərə nisbətən ucuz başa gəlir və daha kiçik torpaq sahəsi tutur. Ümumillikdə dünyada təxminən 5000 kartof növü var.
İqtisadiyyat.az-ın araşdırmasına görə, 2021-ci ildə dünyada 373,4 milyon tondan çox kartof istehsal edilib ki, bu da 2010-cu ildəki 328,6 milyon ton istehsal həcmindən çoxdur.
Çin dünyanın ən böyük kartof istehsalçısıdır. Belə ki, dünyada kartofların təxminən üçdə biri Çin və Hindistanda istehsal olunur.
Araşdırmalara görə, 2022-ci ildə dünyada 374,7 milyon ton kartof yığılıb ki, bu da 2002-ci ildən bəri ən yüksək göstəricidir:
| İllər | Kartof yığımı |
| 2002 | 316,4 milyon ton |
| 2003 | 314,7 milyon ton |
| 2004 | 336,2 milyon ton |
| 2005 | 326,6 milyon ton |
| 2006 | 307,3 milyon ton |
| 2007 | 323,9 milyon ton |
| 2008 | 329,9 milyon ton |
| 2009 | 334,7 milyon ton |
| 2010 | 328,6 milyon ton |
| 2011 | 367,8 milyon ton |
| 2012 | 361 milyon ton |
| 2013 | 365 milyon ton |
| 2014 | 369,9 milyon ton |
| 2015 | 366 milyon ton |
| 2016 | 354,8 milyon ton |
| 2017 | 368,5 milyon ton |
| 2018 | 364 milyon ton |
| 2019 | 366,8 milyon ton |
| 2020 | 369,3 milyon ton |
| 2021 | 373,7 milyon ton |
| 2022 | 374,7 milyon ton |
Məlumata görə, dünyada kartofun qiymətinin ən yüksək olduğu ölkə Cənubi Koreyadır. Belə ki, ötən il ölkədə 1 kq kartofun qiyməti 4,14 dollar olub. Ötən il ABŞ 3,08 dollarla bu siyahıda üçüncü olub.
2023-cü ildə kartof idxalına ən çox xərc çəkən ölkə Belçika olub. Həmin il ölkə kartof idxalına 1 milyard dollardan çox pul xərcləyib. Siyahıda 502,3 milyon dollarla İspaniya ikinci, 480 milyon dollarla Niderland üçüncü olub.
Eyni zamanda, 2022-ci ildə dünya üzrə ən çox kartof ixrac edən ölkə 964,5 milyon dollarla Niderland olub. Adambaşına ən çox kartof istehlak edən ölkələr isə Belarus, Ukrayna və Qırğızıstandır.