Ötən ilin noyabrında Bakı şəhər Suraxanı rayonunda oğlunu və arvadını güllələyən şəxsə hökm oxunub.
Məcra.az xəbər verir ki, 1955-ci il təvəllüdlü Eldar Dadaşov Cinayət Məcəlləsinin 29, 120.2.4, 29, 120.2.5 və 29, 120.2.7-ci (xüsusi amansızlıqla, tamah məqsədilə və iki və ya daha çox şəxsi öldürməyə cəhd) maddələri ilə təqsirli bilinib.
Bakı Ağır Cinayətlər Məhkəməsinin hökmü ilə ona 9 il müddətinə həbs cəzası verilib.
Araşdırmalar zamanı məlum olub ki, E.Dadaşov yaşadığı evi satmaq istəyib. Lakin oğlu, arvadı və gəlini buna razı olmayıb. Onlar Elda Dadaşovun tez-tez evdə dava salması ilə bağlı polisə müraciət ediblər. Bundan sonra E.Dadaşov gəlini ilə oğlunu qətlə yetirmək qərarına gəlib. O, ilk olaraq tüfənglə gəlininə atəş açsa da, güllələr qadına dəyməyib. Daha sonra o, bir neçə dəfə atəş açaraq 64 yaşlı həyat yoldaşı Nazilə Pirimovanı və 34 yaşlı oğlu Ağaəli Dadaşovu yaralayıb. E.Dadaşov və güllə xəsarəti almış oğlu yerə yıxılıb dalaşarkən gəlini silahı götürərək küçəyə qaçıb və qonşulara hadisə barədə məlumat verib. (Adalet.az)