Cəlilabadda İcma əsaslı məktəbəqədər təhsil qruplarında monitorinqlər aparılıb.
Mecra.az xəbər verir ki, Cəlilabad rayonu üzrə təhsil sektoru tərəfindən rayonun ümumtəhsil məktəbində fəaliyyət göstərən icma əsaslı məktəbəqədər təhsil qruplarında növbəti monitorinqlər həyata keçirilib. Monitorinq zamanı uşaqların inkişaf mühiti, dərs prosesinin təşkili, istifadə olunan təlim resursları, gigiyenik şərait və pedaqoji fəaliyyətin keyfiyyəti qiymətləndirilib.
Aparılan müşahidələr ümumilikdə qruplarda təlim mühitinin səmərəli qurulduğunu göstərib. Bununla yanaşı, təlim resurslarının daha da zənginləşdirilməsi, fəaliyyətlərin uşaqların yaş xüsusiyyətlərinə uyğunlaşdırılması və interaktiv metodların tətbiqinin genişləndirilməsi ilə bağlı müvafiq tövsiyələr verilib.
Monitorinqlərin aparılmasında məqsəd uşaqlar üçün keyfiyyətli, təhlükəsiz və inkişafyönümlü təlim mühiti yaratmaq, həmçinin onları erkən yaşlarda məktəbəqədər təhsil səviyyəsinə hazırlamaqdan ibarətdir. Bu istiqamətdə dəstəkləyici və öyrədici xarakterli monitorinqlər davam etdiriləcəkdir.
Raqil Quliyev
