Cəlilabad Rayon İcra Hakimiyyətinin başçısı Rafiq Cəlilov Kazımabad kəndində şəhid məzarlarını və şəhid ailələrini ziyarət edib.
Mecra.az xəbər verir ki, əvvəlcə Kazımabad kənd qəbiristanlığına baş çəkilib. Burada Vətənimizin azadlığı və suverenliyi uğrunda canlarını qurban vermiş igidlərimiz şəhid Murad Bədirov, şəhid Zakir Bədirov, şəhid İlqar Ağayev və şəhid Şəhriyar Əsgərovun məzarları ziyarət edilib. Məzarları önünə gül dəstələri düzülüb, onların ruhuna dualar oxunub, qəhrəmanlarımızın döyüş yolu və göstərdikləri şücaətlər barədə danışılıb.
Ziyarət zamanı şəhidlərin Vətən qarşısında göstərdikləri misilsiz xidmətlər, onların fədakarlığının bu gün ölkəmizdə möhkəm birlik və əmin-amanlıqla yaşamağımızın əsas səbəblərindən biri olduğu xüsusi vurğulanıb.
Daha sonra şəhid Zakir Bədirovun və şəhid Murad Bədirovun ailələri ziyarət olunub, onların qayğı və ehtiyacları ilə maraqlanılıb. Görüş zamanı şəhid ailələrinin daim dövlətimizin diqqət və qayğısı ilə əhatələndiyi bildirilib.
Ziyarət çərçivəsində icra başçısı Rafiq Cəlilov şəhid ailələri ilə səmimi söhbətlər aparıb, bildirib ki, şəhidlərimizin qəhrəmanlığı xalqımızın yaddaşında daim yaşayacaq və gələcək nəsillər üçün örnək olacaq.
Şəhid ailələri dövlətimizin göstərdiyi diqqət və qayğıdan razı qaldıqlarını bildirib, Azərbaycan Respublikasının Prezidenti, Müzəffər Ali Baş Komandan Cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə ediblər.
