Özbəkistanda Azərbaycanın Zəfər Gününə həsr olunmuş konsert tədbiri keçiriləcək.
8 Noyabr Azərbaycanın müasir tarixinə qızıl hərflərlə yazılmış Zəfər Günüdür.
Məcra.az xəbər verir ki, bu gün təkcə Azərbaycanda yaşayan azərbaycanlılar üçün deyil, xaricdə yaşayan soydaşlarımız üçün də əlamətdar bir gündür. Bu əlamətdar tarixlə əlaqədar cari ilin 6 noyabr tarixində Azərbaycan Respublikası Mədəniyyət Nazirliyinin dəstəyi, Özbəkistandakı Heydər Əliyev adına Mədəniyyət Mərkəzinin layihəsi ilə tədbir və konsert proqramı keçiriləcək.
Azərbaycan Mədəniyyət Mərkəzində keçiriləcək konsertdə Azərbaycanın və Özbəkistanın xalq artisti Gülyanaq Məmmədova, Özbəkistan, Qaraqalpaqıstan, Başqırdıstan və Tatarıstanın xalq artisti Jenisbek Piyazov, Özbəkistanda tanınmış azərbaycanlı saz ustası İlham Abdullayev, Özbəkistanın “Özbəyim yoşları” musiqi qrupu, habelə Azərbaycan Mədəniyyət Mərkəzinin “Azərbaycan” adlı rəqs ansamblının çıxışları nəzərdə tutulub. Sözügedən tədbir çərçivəsində ilk olaraq Mərkəzin foyesində Azərbaycan xalqının zəfərinə həsr edilmiş foto sərgi də iştirakçılara təqdim olunacaqdır.
Səbinə Qürbətli