Ölkəmizdə Prezident seçkilərinin 2004-cü ilin fevralına təyin edilməsi ən doğru tarix hesab oluna bilər. İkinci Qarabağ müharibəsində əldə olunan Zəfər, lokal antiterror tədbirləri nəticəsində torpaqlarımızdan silahlı separatizmin kökünün kəsilməsi və ölkənin bütün əraziləri üzərində suveren hüquqlarımızın tam bərpa edilməsi Cənubi Qafqaz regionu ilə yanaşı, Azərbaycandakı reallıqları da dəyişib. Bugünkü reallıqlar müstəvisindən geriyə baxanda 2018-ci ildən etibarən atılan bütün addımların bizi ərazi bütövlüyümüzün bərpası uğrunda həlledici mərhələyə doğru apardığını görə bilərik. Bu faktor qarşıdakı mərhələdə bir çox istiqamətdə ölkəmizin və xalqımızın rifahı, təhlükəsizliyi və inkişafı üçün mühüm qərarların qəbul edilməsinə, yeni bir siyasi, iqtisadi strateji inkişaf proqramının həyata keçirilməsinə zəmin yaradıb.
Seçkinin 2024-cü ilin fevralına təyin edilməsini zəruri edən digər amillər də var və bu amillər şübhəsiz ki, ilk növbədə Azərbaycan xalqının mənafeyinə, dövlətimizin milli maraqlarına xidmət edir. Seçki kifayət qədər ciddi, məsuliyyətli, insan resurslarının üzərində qurulan bir prosesdir. Bütövlükdə isə seçki, dövlət hakimiyyəti orqanlarının Azərbaycan vətəndaşları tərəfindən formalaşdırılması üçün yeganə legitim vasitə olmaqla yanaşı, həm də yeni başlanğıclara körpü salan stimulverici amildir. Prezident seçkiləri həm də milli iradənin təntənəsi, Azərbaycan xalqının vahid mövqeyinin və gələcəyə baxış bucağının ifadəsi üçün vasitədir.
Hamıya gün kimi aydındır ki, Azərbaycan xalqının və dövlətinin qarşısında yeni üfüqlər açan tarixi bir dövrə qədəm qoymuşuq. Milli həmrəyliyimiz, dövlətimizin gücü, Ordumuzun misli görünməmiş fədakarlığı, Ali Baş Komandanın mili iradəni ifadə edən qətiyyəti sayəsində ərazimiz bütövləşib.
Düşünürəm ki, Prezident İlham Əliyevin növbədənkənar prezident seçkiləri ilə bağlı qərarının da, məhz bu zərurətdən doğub. Növbədənkənar seçkilərin keçirilməsi qərarı Prezident, Müzəffər Ali Baş Komandan İlham Əliyevin özünə inamının, xalqın siyasi dəstəyinə əminliyinin ən bariz göstəricisidir. Dövlət başçımız bu günə qədər dediyi hər məsələni uğurla həyata keçirib, həmişə öz sözünün üstündə möhkəm dayanıb. Biz, bütün hallarda gələcəyə nikbin nəzərlərlə baxmalıyıq. Bu seçkilərin çağdaş Azərbaycanın tarixində mühüm rol oynayacağına, qarşıda dayanan milli hədəflərimizə çatmaq üçün yeni bir başlanğıca çevriləcəyinə şübhə etmirik.
Mehman Rzayev,
72 saylı Cəlilabad kənd seçki dairəsinin sədri