Yazını yazmağa başlamazdan əvvəl mövzu ətrafında xeyli düşündüm. Çünki adətən mən məqaləni də şeir kimi yazıram. Gərək o abu-havaya düşəm, düşünəm, oxşarlıqları tapam, onları müqayisə edəm və izahını verəm.
Cəlil Məmmədquluzadə Azərbaycanın böyük yazıçısı, ictimai xadimi, “Molla Nəsrəddin” ədəbi məktəbinin banisi və ideya rəhbəri olub. Düşünürəm ki, 62 illik ömrünü insanların maariflənməsinə həsr edən bu adamın şərəfinə 1967-ci ildən rayonumuzun Cəlilabad adlandırılması elə ən gözəl payımızdır.
Aradan 56 il vaxt ötür və Cəlilabad rayonuna Mirzə Cəlilin öz yerlisi Rafiq Cəlilov adlı şəxs icra başçısı təyin olunur. O Rafiq Cəlilov ki, soyadında Mirzə Cəlilin adını daşıyır. Ona görə hesab edirəm ki, doğulduğumuz doğma Cəlilabad Rafiq Cəlilova bizdən də bir köynək yaxındır. Buna şübhəm yoxdur.
Bir neçə gün öncə Cəlilabad rayon İcra Hakimiyyətinin iki vəzifəli şəxsi korrupsiya əməlinə görə həbs edildi. Məlum oldu ki, rüşvət alıblar. Onları müdafiə etmək niyyətində deyiləm. Ən yaxşısını hüquq-mühafizə orqanları bilir.
Rafiq Cəlilovla ötən ilin 22 iyulunda Milli Mətbuat günündə jurnalistlərlə görüşü zamanı söhbət etdik. Mən icra başçısına ilk öncə iki şeyə görə təşəkkür etdim. Birincisi o idi ki, İcra başçısı Göytəpə qəsəbəsində illərdir ki, su altında qalan iki naməlum şəhid məzarını təmir etdirdi. İkincisi isə Cəlilabad Şəhidlər Xiyabanının əsaslı təmiri idi. Yəni adam rayona icra başçısı təyin olunan kimi ən həssas yerdən başladı. Onu demək istəyirəm ki, 13 ildir mətbuatda külüng çalıram, şəhid ailələrini qapı-qapı gəzirəm, onlar haqda yazılar hazırlayıram, problemlərini aidiyyatı qurumların diqqətinə çatdırıram. Bu gün Cəlilabadda hansı şəhid evinə yolum düşübsə Rafiq müəllimdən razılıq ediblər. Rafiq müəllim qapı-qapı şəhid ailələrini gəzir, rayonun ən ucqar kəndlərinə belə gedib şəhidin ailəsini yoxlayır.
Ötən ilin sentyabr ayının 14-də Cəlilabada düşmənlə döyüşdə şəhid olan üç hərbçimizin nəşi gətirildi. Həmin vaxt mən də rayonda idim. Şəhidimiz gizir Səid Sarbala oğlu Həsənov Əsədli kəndində, əsgər Qasımov Rəşad Ənvər oğlu Alar kəndində və Baş gizir Məmmədov Nahid Hüseynağa oğlu Vənlik kəndində dəfn edildi. Təsəvvür edin ki, icra başçısının göstərişi ilə şəhidlərimiz növbəli şəkildə dəfn edildi və hər bir şəhidin dəfn mərasimində Rafiq Cəlilov şəxsən özü iştirak etdi. Şəhid Nahid Məmmədovu dəfn edəndə artıq axşamüstü idi.
Rayona yolum düşəndə diqqətimi çəkən işıqlı işlərdən biri də Cəlilabad-Göytəpə yolunun işıqlandırılmasıdır. Həm bir rayon sakini, həm də bir sürücü kimi bu məni çox sevindirdi. Yadımdadır bu yolun işıqlandırılması üçün işıq dirəkləri basdırılanda ətrafımda olanlardan buna ağız büzənlər də oldu. Amma bir gün o işıqlar yananda həmin adamlardan birini gecə o yolla maşınımla aparıb-gətirdim. Söhbətimiz zamanı etiraf etdi ki, doğrudan da bu işə nahaq yerə ağız büzüb. Axı adi bir evimizdə kimsə otaqda işığı yandıranda ona deyirik ki, “səni görüm işıqlığa çıxasan, nə yaxşı işığı yandırdın”.
İndi Rafiq Cəlilov bir otağı yox e, bir rayonu işıqlandırır. Ona “işıqlığa çıxasan” demək kimə əziyyətdi?! Sonuncu dəfə qış ayları idi, rayon sakinləri kimi mən də vətəndaş qəbuluna yazılıb Rafiq müəllimlə görüşdüm. Onun diqqətinə bir neçə problemləri çatdırdım və söz verdi ki, o problemlər də həll olunacaq. Buna inanıram. Cənab Prezident, Ali Baş Komandan İlham Əliyevə cəlilabadlılar adından ona görə təşəkkür edirik ki, Rafiq Cəlilov kimi şəxsi rayonumuza icra başçısı təyin edib.
Allah dövlətimizi qorusun!
