Xəbər verdiyimiz kimi, ölkənin cənub rayonu Cəlilabadda istixana şəraitində yetişdirilən kartofun yığımına başlanılıb. İlk günlərdə kiloqramı 1.70 qəpiyə satılan kartofun qiyməti sakinlərin ürəyincə olsa da, bu sevinc çox çəkməyib.
Mecra.az-a danışan Cəlilabadın Muğan kənd sakini Raqil Quliyev hazırda kartofun kiloqramının 60 qəpiyə düşdüyünü bildirib:
“Kartofun kiloqramı 1.70 qəpikdən 60 qəpiyə düşüb. Fəhlə isə günü 25 manata işləyir. Hələ qarşıda açıq kartofun yığımı gözlənilir. Bu isə təbii ki, əkinçilərə sərf etmir. Kartofu ilk günlərdə qəsdən almadılar və qiyməti 60 qəpiyə saldılar. Hansı ki, ötən il kartofun start qiyməti 2 manat oldu. Bir müddət 1.50 qəpiyə, 1 manata satdıq və sonra qiymət düşdü. Amma bu il qiyməti çox tez aşağı saldılar. Açıq kartofun yığımına isə gələn ay başlanılacaq. Hazırda kartof heç xərcini ödəmir, biabırçılıqdı. İndi yığımına başladığımız məhsulun toxunu 1.20 qəpiyə almışdıq”.
R.Quliyevin sözlərinə görə, əkinçilərə məhsullarını satmaqda ən böyük problem yaradan el arasında “dəllal” adlanan vasitəçilərdir:
“Bu adamlar fəhləni də əkinçilərə satırlar. Məsələn, mənə kartofumu yığmaq üçün fəhlə lazımdırsa, mən dəllalı da, sürücünü də “görüm-baxım” etməliyəm. Heç dəllaların “dobro”su olmasa, kəndə gələn alverçi də məhsulumuzu almır. Bir sözlə, fəhlə də, alverçilər də dəllalların əlindədir. Alverçi birbaşa kəndlinin özündən məhsul ala bilmir, dəllala deyir və o kimdən istəyir məhsul alır. Məhsulumu satmağıma görə də dəllala pul verməliyəm. Bu adamların fəaliyyəti nəzarətə götürülməlidir. Əgər belə davam etsə, vəziyyət çox çətin olacaq. Hal-hazırda sahələrdə kartof qalıb alıcısını gözləyir”.
R.Quliyevin sözlərinə görə, “Meyvəli” bazarında da vəziyyət ürəkaçan deyil:
“Dünən “Meyvəli” bazarında idim və burda da Cəlilabad kartofunun kiloqramı 60 qəpik idi. Bazarda xaricdən gələn kartof növləri çox olduğu üçün bizim məhsulun satışına mənfi təsir edir. Əgər xaricdən gələn kartofun daşınması dayandırılsa, Cəlilabad kartofuna tələbat artar”.
Çiyələk əkini ilə məşğul olan Muğan kənd sakini Elçin Qürbətov isə artıq iki ildir ki, kartof əkinindən imtina etdiyini bildirib:
“Kartofun qiyməti 50 qəpiyə düşüb. Elə əkinçi var heç sahəsinə əl vurmayıb. Mən artıq ikinci ildir ki, kartof əkinindən imtina etmişəm. Çiyələk əkini ilə məşğulam, becərmək çətindir, amma satışı asandır. Birbaşa gəlib həyətindən götürüb aparırlar. Daha alıcı axtarmırsan”.
E.Qürbətov deyib ki, çiyələyin kiloqramı satış vaxtı dəyişir:
“Çiyələyi soyuduculara təhvil veririk və qiyməti də onlar təyin edirlər. İlk vaxtlar 3 manata satdıq, sonra 2.60 qəpiyə və sonra 1.60 qəpiyə düşdü. Sabah isə 2 manata satacağıq. Çiyələk sahəsində də fəhlələr 20 manata işləyir. Amma mayın 1-dən 25 manata işləyəcəklər”.
Cəlilabad rayon Aqrar İnkişaf Mərkəzindən isə saytımıza bildirilib ki, bu il 2855 hektardan çox ərazidə kartof, 910 hektar ərazidə çiyələk əkilib.
Vasif ƏLİHÜSEYN
