Ağcabədi rayonunda ağır yol-nəqliyyat hadisəsi olub.
“Qafqazinfo”nun xəbərinə görə, qəza hadisəsi laçınlıların kompakt məskunlaşdığı Qayğı qəsəbəsində qeydə alınıb.
İlkin məlumata görə, Laçın rayon sakini Bakir Möhbalı oğlu Quliyevin idarə etdiyi 41 BE 893 dövlət qeydiyyat nişanlı, “VAZ” markalı minik avtomobili Yevlax rayon sakini Azər Bənah oğlu Bədəlova məxsus “KamAZ” markalı yük avtomobili ilə toqquşub.
Qəza nəticəsində “VAZ”ın sürücüsü Bakir Quliyev hadisə yerində həyatını itirib. Avtomobildə olan sərnişinlər – 1980-ci il təvəllüdlü Habil Əli oğlu Həsənov və onu iki övladı – 2008-ci il təvəllüdlü Polad Habil oğlu Həsənov, 2013-cü il təvəllüdlü Murad Habil oğlu Həsənov, eləcə də, 2014-cü il təvəllüdlü Razi Surxay oğlu Həsənov müxtəlif dərəcəli bədən xəsarətləri alıblar.
Yaralılar dərhal Ağcabədi Rayon Mərkəzi Xəstəxanasına çatdırılıb.
Məlumata görə, həyatını itirən Bakir Quliyev baytarlıq sahəsində çalışıb. “KamAZ” markalı yük avtomobilinin isə Ağcabədi rayonunda Kür çayında uçan bəndin bərpası işlərinə cəlb olunan nəqliyyat vasitələrindən biri olduğu bildirilir.
Faktla bağlı araşdırma aparılır.
