Şəki şəhərinin Dağdibi adlanan ərazisində üç gəncin müxtəlif vaxtlarda intihar etməsi ilə bağlı xəbərlər yayılmışdı.
Baku TV-nin əməkdaşı sözügedən hadisənin təfərrüatlarını araşdırmaq üçün intihar edən gənclərdən biri – 24 yaşlı Sayiq Sayiqzadənin atasının evində olub.
Mərhumun atası Səbuhi Həmidov iddia edib ki, müəmmalı ölümlərin hamısının arxasında narkomafiya durur.
“Mənim uşağımı təhdid ediblər. Yoxsa iki gün sonra övladı dünyaya gələcək adam gedib özünü asmazdı”, – deyə o qeyd edib.
S.Həmidov oğlunun narkotikdən istifadə etdiyini ölümündən sonra bildiyini deyib.
“Şübhəm var idi. Bilsəydim, əvvəldən ölçü götürərdim. Ekspertiza etdirdim, qan analizinin cavabı da var”, – deyə o əlavə edib.
Mərhumun atası Baş prokuror Kamran Əliyevə müraciət edərək məsələnin nəzarətə götürülməsini xahiş edib.
Daha ətraflı süjetdə: