Azərbaycanın müstəqilliyinin ilk illəri siyasi, sosial və iqtisadi baxımdan son dərəcə mürəkkəb mərhələ ilə yadda qalmışdır. Dövlət institutlarının zəiflədiyi, daxili çəkişmələrin dərinləşdiyi həmin dövrdə ölkənin gələcək inkişaf istiqamətinin müəyyənləşdirilməsi üçün yeni siyasi təşkilatlanmaya ciddi ehtiyac yaranmışdı. Məhz belə bir şəraitdə, 21 noyabr 1992-ci ildə Yeni Azərbaycan Partiyasının yaradılması dövrün obyektiv tələbindən doğan tarixi hadisə kimi çıxış etdi.
YAP-ın təşəkkül tapmasının əsas səbəblərindən biri də geniş ictimai-siyasi çevrələrin ölkəni böhrandan çıxara biləcək güclü liderə ehtiyac duyması idi. Bu kontekstdə Heydər Əliyev şəxsiyyəti xüsusi yer tuturdu. Onun zəngin siyasi liderlik təcrübəsi, idarəetmə bacarığı və müasir dövlətçilik ənənələrini formalaşdırmaq potensialı xalq tərəfindən böyük etimadla qarşılanırdı. Heydər Əliyevin siyasi ekolu Azərbaycanda dövlətçiliyin bərpası və möhkəmlənməsi üçün zəruri ideoloji, hüquqi və təşkilati baza yaradırdı. 1992-ci ildə 91-lərin Ulu Öndərə müraciəti və Heydər Əliyevin bu çağırışı cavabsız qoymaması ilə bu gün Qafqazın ən güclü, ən geniş sosial baza və təşkilatlanma imkanlarına malik siyasi partiyası– Yeni Azərbaycan Partiyası yaranmış oldu.
Heydər Əliyevin rəhbərliyi yalnız siyasi sabitliyin təmin edilməsi ilə məhdudlaşmadı. Onun fəaliyyəti çoxşaxəli dövlət quruculuğu prosesini əhatə edirdi. 1995-ci ildə müstəqil Azərbaycanın ilk Konstitusiyasının qəbul edilməsi hüquqi dövlətin əsasını yaratdı; ordu quruculuğu sahəsində həyata keçirilən islahatlar müasir və peşəkar Azərbaycan Silahlı Qüvvələrinin formalaşmasını təmin etdi; uşaq və qadın hüquqlarının müdafiəsi, sosial təminat mexanizmlərinin təkmilləşdirilməsi, təhsil və mədəniyyət sahələrində qəbul edilən strateji qərarlar isə Azərbaycanın gələcək inkişafının bünövrəsini qoydu. Bu fəaliyyət ümumilikdə Azərbaycanın dövlətçilik ənənələrinin möhkəmlənməsində həlledici rol oynadı.
Zaman keçdikcə Yeni Azərbaycan Partiyası ölkənin siyasi sisteminin əsas aparıcı qüvvələrindən birinə çevrildi. Müasir dövrdə partiyanın sədri, Azərbaycan Prezidenti İlham Əliyev tərəfindən həyata keçirilən genişmiqyaslı islahatlar YAP-ın strukturunun, fəaliyyət fəlsəfəsinin və ideoloji xəttinin dövrün çağırışlarına uyğunlaşdırılmasına yönəlmişdir. Bu islahatlar idarəetmənin modernləşdirilməsini, partiya daxilində gəncləşməni, institusional çevikliyi və funksionallığın artırılmasını təmin edir.
Prezident İlham Əliyevin rəhbərliyi altında Azərbaycan yalnız daxili inkişaf kursunu davam etdirmir, eyni zamanda beynəlxalq aləmdə mövqelərini ardıcıl şəkildə möhkəmləndirir. 2020-ci ildə Vətən müharibəsində əldə olunan tarixi Qələbə ölkənin ərazi bütövlüyünün bərpası ilə yanaşı, İlham Əliyevin qətiyyətli liderliyinin, strateji baxışının və güclü siyasi iradəsinin təsdiqi oldu. Dövlət başçısının diplomatik fəallığı, hərbi-siyasi balansı dəqiq şəkildə qoruyan siyasəti və informasiya müharibəsində qazandığı üstünlük Azərbaycanın regional güc kimi statusunu daha da möhkəmləndirdi. Bununla yanaşı, Azərbaycanın enerji, nəqliyyat, logistika və təhlükəsizlik sahələrində həyata keçirdiyi qlobal əhəmiyyətli layihələr ölkəmizin beynəlxalq nüfuzunu artıran əsas amillərdəndir. Beləliklə, hər ötən il İlham Əliyevin rəhbərliyi ilə ölkənin geosiyasi çəkisi əhəmiyyətli dərəcədə yüksəlor, Azərbaycan regionun təhlükəsizlik arxitekturasında aparıcı aktora çevrilir.
Sonda vurğulamaq istərdim ki, Yeni Azərbaycan Partiyasının yaradılması Azərbaycan siyasi tarixində mühüm dönüş nöqtəsidir. Heydər Əliyevin formalaşdırdığı dövlətçilik məktəbi, onun konstitusiya quruculuğu və sosial-humanitar sahələrdə həyata keçirdiyi islahatlar, eləcə də İlham Əliyevin müasir dövrün çağırışlarına cavab verən yenilənmə siyasəti partiyanın dayanıqlı inkişafını təmin edən əsas sütunlardır. Bu ardıcıl siyasi xətt Azərbaycanın dövlətçilik ənənələrinin möhkəmlənməsinə, milli maraqların təmin edilməsinə və ölkənin regionda aparıcı güc mövqeyini möhkəmləndirməsinə həlledici töhfə verir.
Elçin Məmmədov
Pirallahı rayon İcra Hakimiyyəti başçısı Aparatının
Sosial-iqtisadi inkişafın təhlili və proqnozlaşdırılması şöbəsinin müdiri
