08 dekabr 2025-ci il tarixində Azərbaycan Respublikasının Prezidenti cənab İlham Əliyevin Slovakiyaya rəsmi səfəri baş tutub. Səfər zamanı dövlət başçısı Slovakiya Prezidenti Peter Pelleqrini, Milli Şuranın sədri Rixard Raşi və Baş nazir Robert Fitso ilə görüşərək ikitərəfli əməkdaşlığın inkişaf perspektivlərini müzakirə edib. Bununla yanaşı, Azərbaycan və Slovakiya prezidentləri mətbuata bəyanatlarla çıxış ediblər. Vacib fikirlərin səsləndirildiyi bəyanatlarda iki ölkənin dost və strateji tərəfdaş olduğu xüsusi vurğulanıb.
İki ölkənin əlaqələrinin tarixi inkişafına nəzər saldıqda aydın olur ki, Slovakiya ilə Azərbaycan arasında diplomatik münasibətlər 1990-cı illərin əvvəllərindən etibarən ardıcıl və sistemli şəkildə inkişaf edir. Slovakiya 1992-ci ilin yanvarında Azərbaycanın müstəqilliyini tanımış, 1993-cü ildə isə iki ölkə arasında diplomatik münasibətlər rəsmi şəkildə qurulmuşdur. Slovakiyanın Azərbaycandakı səfirliyi 2019-cu ilin oktyabrından fəaliyyət göstərir. Azərbaycan isə 2023-cü ilin iyulunda Slovakiyada səfirlik təsis edib. Bununla yanaşı, ölkəmizin Slovakiyadakı fəxri konsulluğu 2009-cu ilin aprelindən fəaliyyət göstərir. Bu mərhələlər iki ölkə arasında diplomatik münasibətlərin möhkəm və davamlı xarakter daşıdığını göstərir və strateji əməkdaşlığın daha da genişlənməsi üçün əlverişli zəmin yaradır.
Ötən ilin may ayında Slovakiyanın Baş naziri Robert Fitsonun ölkəmizə rəsmi səfəri çərçivəsində Bakıda imzalanmış Strateji Tərəfdaşlığın Qurulması haqqında Birgə Bəyannamə isə iki ölkənin münasibətlərinin keyfiyyətcə yeni mərhələyə yüksəlməsinə səbəb olub. Bu tarixi sənəd siyasi, iqtisadi, mədəni və ekoloji sahələrdə əməkdaşlığın daha da gücləndirilməsini hədəfləyir. Şübhə yoxdur ki, strateji tərəfdaşlığın formalaşdırılması Azərbaycan–Slovakiya əlaqələrinin həm regional, həm də qlobal müstəvidə dayanıqlı və qarşılıqlı faydalı əməkdaşlıq platformasına çevrilməsinə xidmət edəcək. İki ölkə arasında artan siyasi dialoq, genişlənən iqtisadi əlaqələr, enerji, nəqliyyat, investisiyalar və yaşıl gündəmlə bağlı layihələr münasibətlərin gələcək inkişafının mühüm istiqamətlərini müəyyənləşdirir. Bütün bunlar Azərbaycan ilə Slovakiya arasında qarşıdakı dövrdə daha sıx inteqrasiya, güclü koordinasiya və yeni təşəbbüslərin həyata keçirilməsi üçün geniş imkanlar açır.
Dövlətimizin başçısının ötən günkü səfəri də Azərbaycan–Slovakiya əlaqələrinin inkişafına mühüm töhfə verəcəkdir. Səfər zamanı mətbuata bəyanatla çıxış edən Azərbaycan Prezidenti bir sıra vacib məqamlara toxundu. Burada iki əsas istiqamət, qaz ixracı və müdafiə sənayesi ilə bağlı oldu. Azərbaycan Prezidenti bildirdi ki, biz müharibə aparmaq fikrində deyilik. Yəni, bizim üçün müharibələr artıq keçmişdə qalır və sadəcə olaraq, burada bir sinergiyanın yaradılması üçün Slovakiya texnologiyaları ilə Azərbaycan maliyyə imkanlarını birləşdirərək yeni məhsulların istehsalı dünya bazarları üçün də maraqlı ola bilər.
Bu, açıqlama özülüyündə olduqca vacib və dəyərli bir açıqlamadır. Çünki uzun illər münaqişə şəraitində olmuş Azərbaycan və Ermənistan hazırda sülh prosesini davam etdirirlər. Belə bir həssas mərhələdə müdafiə sənayesinə yönələn hər hansı addımın yanlış anlaşılması riski mövcuddur. Lakin dövlət başçımızın mesajı prosesə aydınlıq gətirir və ölkəmizin sülhə sadiqliyini bir daha ortaya qoyur: Azərbaycanın müharibə niyyəti yoxdur.
Bəli, Azərbaycan bu səhifəni artıq bağlayıb və yeni bir mərhələyə qədəm qoyub —sülh, birgəyaşayış, quruculuq və inkişaf mərhələsinə. Bu səfər və səsləndirilən mövqelər isə Azərbaycanın regionda dayanıqlı sabitlik və əməkdaşlıq gündəmini qətiyyətlə irəliyə apardığını bir daha təsdiqləyir.
Yaqub Hüseynov
Pirallahı rayon Ağsaqqallar Şurasının üzvü
