“Azərbaycan və Ermənistan arasında paraflananan sülh müqaviləsindən doğan proseslər uğurla irəliləyir. Vətəndaş cəmiyyətinin qarşılıqlı səfərlərindən sonra Baş nazirin müavini səviyyəsində səfərin baş tutması bu yöndə aparılan siyasətin səmərəli olduğundan xəbər verir. Baş nazirin müavini Şahin Mustafayevin rəhbərlik etdiyi Azərbaycan nümayəndə heyətinin Ermənistana səfərinin regionda diqqət mərkəzinə çevrilməsi sülhün rəsmiləşməsinə doğru atılan addımların effektli olduğundan xəbər verir”.
Bunu Mecra.az-a siyasi şərhçi Tural İrfan deyib.
Onun sözlərinə görə, digər ümdə məsələlərlə yanaşı əsasən nəqliyyat-kommunikasiya layihələrinin həyata keçirilməsinə doğru mühüm zəruri səylərin göstərilməsi istiqamətində də bu səfərin böyük əhəmiyyəti var:
“Ermənistanda iyunda planlaşdırılan parlament seçkilərindən öncə bu səfərin baş tutması məsələni İrəvan üçün bir qədər də ciddiləşdirir. Çünki gözlənilən, qarşıdakı siyasi addımlara bu səfərin əhəmiyyətli təsiri ola bilər. Sərhədlərin delimitasiya və demarkasiya məsələsi və qarşıda duran bir sıra məsələlər sülh prosesinin tərkib hissəsi olaraq daimi diqqət mərkəzindədir. Regionda İranla bağlı gərginliyin davam etdiyi ərəfədə belə sülhməramlı səfərlərin baş tutması və səmərəli nəticələrin əldə edilməsi ümumilikdə region ölkələri üçün, habelə bölgədə sabitliyin davamlı olması sarıdan da təqdirəlayiqdir”.
T.İrfan bildirib ki, Ermənistan tərəfin də Rusiya və Avropa İttifaqı arsında müəyyən balanslı siyasətinin regiondakı proseslər fonunda koordinasiyalı təşkil olunması, Türkiyə və Azərbaycan maraqlarının ön planda saxlanılması üçün mütəmadi olaraq əyani münasibət zəruridir:
“Hazırda regionda hadisələr qaynar və sürətli olaraq inkişaf edir. Belə bir məqamda bütün fürsətləri düzgün və dinamik istifadə etmək gərəkir ki, Azərbaycan bu yöndə bütün məqamları diqqətdə saxlayır. Əsas mövzular, nəticə Baş nazirin müavininin Ermənistan səfərinin rəsmi təfərrüatı bəyan olunarkən məlum olacaq. Lakin ümumiyyətlə deyə bilərik ki, bu səfər, baş tutmuş görüşlər və aparılmış müzakirələr Azərbaycanın qələbələrinin davamı kimi qiymətləndirilə bilər. Uzun illər münaqişə yaşamış, müharibə şəraitində diplomatik əlaqələri kəsilmiş iki ölkə arasındakı bu rəsmi səfər təkcə Azərbaycan və Ermənistan üçün deyil, bütün bölgə üçün davamlı sülhün, əminamanlığın, inkişafın, normal münasibətlərin carçısısı olacaqdır. Məhz bu cür səfərlərin qarşılıqlı formatda davamiyyəti eyni zamanda sülh prosesinə töhfə verən, prosesi sürətləndirən vasitələrdən hesab oluna bilər”.
Vasif ƏLİHÜSEYN
