“Ataların bir məsəli var – dəvəni qoyub, çulunu döyürlər. Təəssüf ki, bu gün Mədəniyyət Nazirliyindəki həbslərdən də danışırıq. Həqiqətən də günahları varsa, bunu istintaq sübut edəcək, cəzalarını da alacaqlar. Bəs niyə belə olmalıdır? Hamısı xarici ölkələrdə təhsil almış, imkanlı ailədə doğulan gənclərdir. Cənab Prezidentin etimad göstərdiyi gənclər də korrupsiya xəstəliyinə yoluxubsa, deməli, bu xəstəliyi kökündən dezinfeksiya etmək lazımdır. Bu, artıq bir bəladır, fəlakətdir, faciədir”.
Məcra.az xəbər verir ki, bu sözlər açıqlamasında Xalq artisti, kinorejissor Şeyx Əbdül Mahmudbəyov deyib. O, Mədəniyyət Nazirliyi ilə bağlı məsələlərdə nazir Anar Kərimova toxunulmamasına da münasibət bildirib:
“Biz həmişə, təəssüf ki, səbəbi yox, nəticəni kötəkləyib, ortaya qoyuruq. Bəs bütün bu işlərin səbəbi, səbəbkarı kimdir? Bu qədər iş görən bir Prezident var, yüz illərlə üstümüzdə qalmış böyük bir rüsvayçılığı götürən, bizə qənim kəsilən düşməni bu günə qoyan bir Prezident. Başa düşmədim, cənab Prezident əlində çomaq bu məmurların bir-bir arxasınca düşüb gəzməli, onları güdməlidir? Bəs bu adamların insafları, vicdanları yoxdur? Dövlət sizə o boyda vəzifələr, kabinetlər, katibələr, xüsusi avtomobillər, imtiyazlar və yüksək maaş verib. Axı bu pulu sənin tarixi mədəniyyətin, milli idealogiyanın təbliği üçün ayırırlar. Prezidentin etimadına necə xəyanət etmək olar? Sual olunur, sən kimsən? Onda bunların ermənidən fərqləri nədir? Ermənini başa düşürük, tarixi qan düşmənimizdir. Bəs bunlar kimdir? Bəyənmədiyimiz Sovetin vaxtında kimisə partiyaya keçirmək, vəzifəyə qoymaq üçün ən sayılıb-seçilmiş adamlara zəmanət verərdilər, bunun məsuliyyətini daşıyırdılar. Bu gün kütləvi şəkildə gəncləri vəzifəyə qoyurlar. Nə olsun xaricdə oxuyublar? Xaricdə oxumaq hələ idarəçiliyi bacarmaq deyil. Xalqın mənəviyyatını təbliğ edən bir sahədə məsul şəxs korrupsiyaya yol verərmi? Artıq çox böyük dəstək verdiyim Prezidentə də ürəyim ağırıyır. 44 günlük müharibədə Prezident həm tarixçilərin, həm siyasətçilərin işini gördü. Tarixçilər, siyasətçilər Prezidentin 44 gündə dünyaya verdiyi açıqlamaların 1%-ni də indiyədək verməyiblər. Bəs Prezidentin xidmətlərinin qarşılığında bu məmurların verdiyi cavab nədir? Qardaş, evin, ailənin sahibi var. Nəsə bir şikayət olanda ailənin başçısından hesabat soruşurlar. Bizdə belə bir ənənə yoxdur. Niyə yoxdur, başım çıxmır. Bəs adama deməzlər ki, ay cənab nazir, nazirlikdə oturmusan, sən bu korrupsionerləri hardan gətirmisən? Bu nə ənənədir? Nazirin rüşvət alıb-almamasından xəbərim yoxdur. Əvvəla, onun rəhbərlik etdiyi qurumdan, işçilərindən xəbəri yoxdursa, bu, daha pis. Xəbəri var, gücü çatmırsa, ölkənin böyüyü var, desin, cənab Prezident, sabah bir şey olsa, mən ortada qalacağam. Kimdir onlar? Kimdir bunlara güvənib xalqın mal-dövlətini çapıb-talayanlar? Artıq xalqın mənəviyyatını, mədəniyyətini də oğurlayırlar. Bunlar kimə arxalanır, niyə qorxmurlar? Bu, artıq daxili kadr məsələsi, idealoji təhlükədir…”buta.ws