Milli tərəqqidə, müstəqil dövlət quruculuğunda təhsilin, tərbiyyənin əvəzsiz rolu olduğunu Ulu Öndər Heydər Əliyev həmişə vurğulamışdır. Bu ideyanın əsasında, ilk növbədə, yüksəkixtisaslı milli kadr potensialının yaradılması dayanırdı. 1969-1982-ci illərdə 770-ə qədər məktəb binası istifadəyə verilmiş, respublikada ali məktəblərin sayı 12-dən 17-yə, burada təhsil alan tələbələrin sayı isə 70 mindən 100 minə çatdırıldı.
Ulu Öndər Heydər Əliyev hakimiyyətə gələndən sonra keçmiş SSRİ-nin 50-dən artıq böyük şəhərinin 170-dən çox ən məşhur ali məktəblərində respublikamızda ən çox ehtiyac duyulan 250-dən çox ixtisas üzrə 17 minədək azərbaycanlı gəncin təhsil alması təmin olundu. Azərbaycanlı gənclərin respublikadan kənarda təhsil alması intensiv xarakter aldı. onların milli tərkibində azərbaycanlıların xüsusi çəkisi 1970-ci ilədək 40 faiz təşkil edirdisə, bu rəqəm 1976-1977-ci illərdə müvafiq olaraq, 85 və 92 faizə, 1980-ci illərin əvvəllərində 98 faizə yüksəldi.
Azərbaycandilli məktəbin, maarifin inkişafına diqqət artırıldı, Moskvanın etirazlarına baxmayaraq, respublikada rus dili ilə yanaşı, Azərbaycan dilinin də rəsmiliyi təmin edildi, ana dilində təhsilə üstünlük verildi. Azərbaycandilli mətbuatın inkişafı təmin olundu. Heydər Əliyev öyrədirdi ki, hər bir Azərbaycan vətəndaşının ürəyi təhsilin vəziyyəti üçün yanmalı, hər kəs vəzifəsindən, peşəsindən, mövqeyindən asılı olmayaraq bu müqəddəs iş üçün əlindən gələni etməlidir. Bu barədə dönə-dönə fikirləşməli, səhvləri və nöqsanları ciddi şəkildə götür-qoy etməli, milli şüurun perspektivləri üçün cavabdeh olan adamlardan, ən əvvəl vəzifə sahiblərindən xahiş yox, tələb etməliyik.
Ulu Öndər dəfələrlə bəyan etmişdir ki, məktəb yeni insan tərbiyəsinin, hər cəhətdən kamil və bilikli insan yetişdirilməsinin mərkəzidir. Dövrümüzdə təhsil sahəsində ümummmilli lider Heydər Əliyevin vəsiyyətləri layiqincə yerinə yetirilir, ölkə Prezidenti cənab İlham Əliyevin müvafiq tapşırıqlarına tam dəstək verilir, Birinci vitse-prezident Mehriban xanım Əliyevanın təşəbbüsləri geniş miqyasda bəyənilir və həyata keçirilir. Bunların nəticəsində müasir tədris sistemi bərqərar olur, milli təhsilimiz məzmunca müstəqil Azərbaycanın dövlətçilik prinsiplərinə xidmət əsasında, bəşəri dəyərlərə arxalanaraq formalaşır. Bu kontekstdə Vətənimizin oğul və qızlarını həmişə müəyyən sənət, peşə sahibi, öz işinin ustası görmək istəyirik. Onlar öz xalqının əsrlərin sınağından çıxmış milli xüsusiyyətlərinin mahir daşıyıcılarıdır, həyat və əmək nümunələrində xalqın, millətin köklü ənənələri yaşayır. Məhz onların sayəsində yüz illər bundan sonra da xalqımız Heydər Əliyevin təhsilimizə və mədəniyyətimizə göstərdiyi xidmətləri qiymətləndirəcək, irəliyə doğru iri addımlar atacaq, şöhrətlənəcək, varlanacaq, yaşayacaqdır.
Ələsgər Mirzəzadə,
ADPU Cəlilabad filialının müəllimi