“Küçə kəsiminin yığışdırılması mühüm amillərdən biridir, bu biabırçılıqdır. Şəhərin ortasında heyvan kəsirlər. Məsələn, Bakı Təhsil İdarəsinin yaxınlığında bir ət kəsilən yer var və daim orda heyvan bağlanır. Azərbaycan məktəbliləri səhər tezdən dana böyürsütü səsiylə məktəbə gedirlər. Bu şəhərin mərkəzi yerlərindən biridir. Haqqında danışdığımız problem həll olunmamış qalır. Mən bu cür tənqidlərimlə bağlı Azərbaycan Qida Təhlükəsizliyi Agentliyinin sədr müavini Rəşad Mahfusovla görüşmüşəm. Təxminən il yarım öncə baş tutan görüşümüzdə Rəşad müəllim məni inandırmağa çalışıb ki, tezliklə bu məsələni həll edəcəklər. İzah edib bu problem heyvanları identifikasiyasından sonra həllini tapacaq”
Məcra.az xəbər verir ki, bunu açıqlamasında Azad İstehlkaçılar Birliyinin sədri Eyyub Hüseynov küçə kəsimləri haqda danışarkən deyib. Ekspert illərdir ki, bu problemlə mübarizə apardıqlarını bildirib:
“AQTA iki ildən çoxdur ki, fəaliyyət göstərir, amma heyvanların heç bir faizi də identifikasiya olunmayıb. Belə çıxır ki, hörmətli Rəşad Mahfusovun xəyallarının gerçəkləşməsi üçün biz iki yüz il gözləməliyik? Küçə kəsimlərinin mövcud olmasının səbəbləri var. Hamımıza məlumdur ki, bazar tələb və təklif aksiomuyla işləyir. Buna tələb olmasının səbəbi də odur ki, çünki əhali AQTA-nə inanmır. Ona görə də insanlar gözünün qarşısında kəsilən heyvanın ətini almaq istəyir. Sovet vaxtı satılan heyvan ətinin üstündə möhür olurdu. İndi o mühürü qəssabların özləri ətin üstünə vururlar. Bir sözlə, AQTA cəmiyyətlə, istehlakçılarla işləyə bilmir. Hətta bizim qurumla belə effektiv işləyə bilmir.
Ekspert deyib ki, bu cür tənqidlərinə görə AQTA rəsmiləri onun özüylə də mübahisə edib:
“Saxta bir yalançı ictimai şura yaradıldı, yeddi aydan çoxdur ki, onun bir dəfə də olsun iclası keçirilmir, heç bir şey müzakirə olunmur. Ancaq sonuncu yığıncaqda “razborka”mla məşğul oldular ki, məni yerimdə oturdsunlar və bəzi məsələlər barədə danışmayım. Bu da alınmadı, çünki biz kütləvi informasiya vasitələriylə effektiv işləyə bilirik. AQTA-nin ən çatışmayan cəhətlərindən biri də budur ki, onlar kütləvi informasiya vasitələriylə işləyə bilmirlər, yaxud işləmək istəmirlər, yaxud da bunu bacarmırlar. Məni söhbətə çağırdıqları yığıncaqda Rəşad bəyə dedim ki, ATV kanalında harda təhlükəli ət satılmasını göstərdilər. Siz bunu təqib edirsinizmi? Dedi ki, hardan bilirsiniz ki, təqdib etmirik? Sonra öyrəndim ki, heç bir məktub yazmırlar, bunu izləmirlər. Yəni AQTA kütləvi informasiya vasitələrində işləyən şəxslərin əməklərini heçə endirir. Qeyd edim ki, digər dövlət orqanlarında da problem var. Nə qədər ki, bu ictimai nəzarət məsələsi, kütləvi infomasiya vasitələri orqanı və dövlət orqanlarının üçünün birlikdə fəaliyyəti ilə həyata keçirilməyəcək, onda problem həllini tapmayacaq. Küçədə heyvan kəsimləri davam edəcək və bunu inzibati yollarla həll edə bilməyəcəklər”.
E.Hüseynov kəsim məntəqələrində heyvan kəsimin baha olduğunu bildirib:
“Burda İcra Hakimiyyətlərinin də böyük günahı var və onlar bu problemi həll edə bilmirlər. Kəsim məntəqələrində heyvanların kəsimi baha-başa gəlir, bu qiymət ətin qiymətinin üstünə hesablanır, qəssablara əzab verilir. Mənə göndərilən məktubda göstərilir ki, AQTA-nin əməkdaşları heyvanı mərkəzləşmiş kəsim məntəqəsində kəsmədiyi üçün ət satan şəxsləri 1500 manat cərimə edir. Bu effektsiz, səmərəsiz fəaliyyət və istehlakçıların inamını qazanmadan aparılan iş küçə kəsimlərinin davam etməsinə rəvac verəcəkdir. İstehlakçılar gərək bu quruma inansınlar və bilsinlər ki, dükana gətirilən ət doğrudan da tam nəzarət altında olub. AQTA-ni at, eşşək və digər heyvan ətinin satışıyla məşğul olan şəxslərin ifşa edilməsi istiqamətində reydlər keçirir və bununla bağlı məlumat verir. Ölkədə bu da mövcuddur. İyirmi altı ildir ki, biz bununla mübarizə aparırıq və qarşısını ala bilmirik. İstehlakçı hardan bilsin ki, o ətlər dükana gətirilməyib. AQTA buyurun bu düyünləri açsın, bu qurum cəmiyyətə söykənən bir iş görməlidir. Çünki bu hər bir insanın həyatına toxunan məsələdir”.
Qeyd edək ki, bu gün hələ də Bakının Kürdəxanı, Pirşağı, Mehdiabad, Binəqədi kimi kəndlərində heyvanların küçədə kəsilməsi davam edir.
Vasif Əlihüseyn
Adalet.az