Astara rayonunun Diqo kəndi… Bu ucqar kənd gündəmə cəmi bir maşın və bir mağazasının olması, orada 50 uşaq yaşamağına baxmayaraq, məktəb binasının yoxluğu ilə gəlmişdi.
Məcra.az xəbər verir ki, “Qafqazinfo”da bu barədə reportaj yayımlandıqdan sonra məsələ aktuallaşmışdı. İndi sözügedən kənddə yeni məktəbin təməli qoyulub. Bu haqda fotoqraf Orxan Əzim məlumat yayıb. O qeyd edib ki, ilkin məlumata görə, məktəb tezliklə təhvil veriləcək.
Xatırladaq ki, Diqoya yaxın ən yaxın təhsil ocağı 5 kilometr uzaqda yerləşən Pəlikəş kəndindədir. Uşaqlar qar-yağış demədən, dağ yolları ilə həmin məktəbə getmək məcburiyyətindədirlər.
***
Təhsil Nazirliyinin Mətbuat xidmətindən “Qafqazinfo”nun sorğusuna cavab olaraq bildirilib ki, Astara rayonunun Diqo kəndində 56 şagirdlik modul tipli məktəb quraşdırılır. Qurumdan qeyd edilib ki, təhsil ocağının ilin sonuna qədər təhvil verilməsi gözlənilir.