Xəbər verdiyimiz kimi ötən gün İstanbul şəhərinin Bəyoğlu məhəlləsi, İstiqlal küçəsində törədilən terror aktında 6 nəfər həyatını itirib.
Məcra.az Publika.az-a istinadən xəbər verir ki, bu barədə Türkiyə KİV-i məlumat yayıb.
Bildirilib ki, qurbanlar arasında Yusuf Meydan və 3 yaşlı qızı Ecrin Meydan da var.
Qeyd edilib ki, Elazığ şəhərinin Palu rayonunda qeydiyyatda olan ailə qız istəmək üçün Adanadan İstanbula gəliblər. İstiqlal küçəsindən keçərkən xain hücumun qurbanına çevriliblər.
Yusuf Meydanın Ailə və Sosial Xidmətlər Nazirliyinin əməkdaşı olduğu öyrənilib.
Ailə və Sosial Xidmətlər naziri Derya Yanık, İstiqlal küçəsində baş verən partlayışdan sonra sosial media hesabından əldə etdiyi yeni məlumatı paylaşaraq yazıb:
“İstanbuldakı xain hücumun acı xəbəri ürəyimizi parçaladı. Həmkarımız Yusuf Meydan və qızı Ecrini itirdik. Ailəsinə,yaxınlarına və həmkarlarına başsağlığı diləyirəm. Ata və qızının ölümünə səbəb olan bu xain hücumu lənətləyirəm. Dövlət olaraq şəhid olan qardaş və bacılarımızın ailələrinin və yaralıların yanındayıq. Heç bir şər ocaq bizim birliyimizi və həmrəyliyimizi poza bilməyəcək”.