23 fevral Geologiya-mineralogiya elmləri doktoru Abbasov Əlipənah Bəhmən oğlunun anım günüdür.
1954-cü il mart ayının 20-də Azərbaycanın Cəlilabad rayonunun Üçtəpə kəndində anadan olub. O, 1975-ci ildə Azərbaycan Dövlət Universitetinin (hazırda Bakı Dövlət Universiteti) geologiya-coğrafiya fakultəsini fərqlənmə diplomu ilə bitirib. Ə.Abbasov təyinatla 1975-1978-ci illərdə Rusiyanın Orenburq vilayətində geoloji ekspedisiyada çalışıb.
1978-1997-ci illərdə Azərbaycan Elmlər Akademiyasının Geologiya İnstitutunda elmi əməkdaş kimi laboratoriyaya rəhbərlik etmişdir. 1982-ci ildə, 28 yaşında “Kiçik Qafqazın Sarıbaba sinklinoriumunun gec təbaşir radiolariyaları və onların stratiqrafik əhəmiyyəti” mövzusunda namizədlik, 1993-cü ildə, 39 yaşında isə “Azərbaycanın təbaşir radiolariyaları (biostratiqrafiya, ekologiya, təkamül)” mövzusunda doktorluq dissertasiyası müdafiə etmişdir.
Gənc yaşında elmi nəaliyyətləri ilə tanınan Ə.Abbasov ilk dəfə olaraq radiolariyalara görə Azərbaycanın təbaşir çöküntülərinin ayrı-ayrı rayonlar üzrə bölünmə sxemini hazırlamış, silisiumlu vulkanogen suxurların yaşını müəyyən etib. Kiçik Qafqazda silisium oksidinin toplanma sxemini hazırlamış, Azərbaycanın təbaşir radiolayilarının inkişafında əsas mərhələləri müəyyən etmişdir.
O, 40-dan çox elmi əsərin müəllifi və“Azərbaycan təbaşir faunası” monoqrafiyasının həmmüəllifidir. Onun əsas elmi işləri Azərbaycanda Yura dövrü ammonitlərinin tədqiqi və stratiqrafiyası ilə bağlı olmuşdur.
Ə.Abbasov 1997-ci ilin fevral ayının 23-də Bakı şəhərində vəfat edib.
Vaxtsız dünyasını dəyişən alimin bir qız və bir oğlan övladları yadigar qalıb. Cəlilabad rayonunun Üçtəpə kəndində dəfn olunmuşdur. Allah rəhmət eləsin!
