Cəlilabad Rayon İcra Hakimiyyətinin təşkilatçılığı ilə Cəlilabad Tibb Kollecində Gənclərə erkən nikahın və qohumlar arasında nikahın mənfi fəsadlarının izah edilməsi, gənclərin ailə qurmağa hazırlıq səviyyəsinin artırılması və onlarda ailə məsuliyyətinin formalaşdırılması məqsədilə maarifləndirici tədbir təşkil edilib.
Mecra.az xəbər verir ki, tədbirdə rayon icra hakimiyyəti başçısı aparatının böyük məsləhətçisi-Uşaq hüquqlarının müdafiəsi üzrə komissiyanın məsul katibi Xumarə Xəlilova, rayon icra hakimiyyəti başçısı aparatının aparıcı məsləhətçisi, Uşaq hüquqlarının müdafiəsi üzrə komissiyanın məsləhətçi-psixoloqu Özal Kazımov, Azərbaycan Dövlət Pedaqoji Universitetinin Cəlilabad filialının tarix müəllimi Ələsgər Mirzəzadə, Dini Qurumlarla İş üzrə Dövlət Komitəsinin Lənkəran-Astara Regional bölməsinin məsləhətçisi-Həsən Hümbətov, rayon polis şöbəsinin ictimai təhlükəsizlik bölməsinin yetkinlik yaşına çatmayanlarla profilaktiki işin təşkili qrupunun baş inspektoru Anar Atakişiyev, Lənkəran -Astara Regional Təhsil İdarəsinin Cəlilabad rayonu üzrə təhsil sektorunun aparıcı məsləhətçisi Tacəddin Əli və tələbələr iştirak etmişlər.
Tədbirdə erkən nikahların yaratdığı sosial, psixoloji və hüquqi fəsadlardan bəhs edilib. Çıxış edənlər bildiriblər ki, erkən yaşda qurulan ailələrdə tərəflər ailə həyatına tam hazır olmur, bu isə ailədaxili münaqişələrə, təhsilin yarımçıq qalmasına və sosial asılılığa səbəb olur.Həmçinin ailə dəyərlərinin düzgün təbliğinin vacibliyi vurğulanıb.
Qeyd olunub ki, sağlam ailə qarşılıqlı hörmət, məsuliyyət, sevgi və anlayış üzərində qurulmalıdır. Gənclərin təhsil alması, peşə sahibi olması və nikaha şüurlu qərarla daxil olması cəmiyyətin inkişafı üçün əsas şərtdir.Tədbirdə valideynlərin məsuliyyəti, cəmiyyətin maarifləndirilməsi və erkən nikahların qarşısının alınması istiqamətində birgə fəaliyyətin əhəmiyyəti də diqqətə çatdırılıb.
