Azərbaycan Respublikasının Prezidenti cənab İlham Əliyev Bakı Ekspo Mərkəzində məişət tullantıları daşıyan texnikalarla tanış olub. Ölkə başçısı bildirib ki, Azərbaycanda paytaxt Bakı ilə yanaşı, bölgələrimizin inkişafı, orada müasir sosial infrastrukturun, o cümlədən parkların, yaşıllıq və meşə zolaqlarının yaradılması və bununla da ümumilikdə ölkəmizin ekoloji durumunun yaxşılaşdırılmasına yönəlmiş layihələr ardıcıl şəkildə davam etdiriləcəkdir.
Ekologiya və Təbii Sərvətlər Nazirliyinin sifarişi ilə Gəncə avtomobil zavodunda istehsal edilmiş, kommunal təsərrüfatı sahəsinin maddi-texniki bazasının gücləndirilməsi məqsədilə Cəlilabad Rayon İcra Hakimiyyətinə hər birinin tutumu 22 kubmetr olan 2 (iki) ədəd xüsusi texnika ayrılıb.
Mecra.az xəbər verir ki, Cəlilabad Rayon İcra Hakimiyyəti tərəfindən rayon ərazisində aparılan abadlıq-quruculuq işləri ilə yanaşı ərazilərin təmizlənməsi, tullantıların toplanması və daşınması işləri də daim diqqət mərkəzində saxlanılır. Bu baxımdan rayon İcra Hakimiyyətinin tabeliyində fəaliyyət göstərən Cəlilabad Kommunal Müəssisələr Kombinatının maddi-texniki bazasının gücləndirilməsi istiqamətində ardıcıl işlər aparılır.
Xidmət sahəsinin fəaliyyətinin daha səmərəli təşkili, məişət tullantılarının vaxtında toplanması və daşınması məqsədilə texnikalar əvəzsiz olaraq Cəlilabad rayon Kommunal Müəssisələri Kombinatına təqdim edilmişdir.
Məişət və digər tullantıların xüsusi konteynerlərdən yığılaraq poliqona daşınması üçün nəzərdə tutulan yeni texnikalar ilə təminat əhalinin məişət şəraitinin yaxşılaşdırılmasına, ətraf mühitin təmizliyinin qorunmasına və iş prosesinin operativliyinin artırılmasına xidmət edir.
Əhalimizi məişət tullantılarını zibil qutularına atmağa, şəhərimizin estetik görüntüsünə və ekoloji cəhətdən çirklənməsinə qarşı birgə mübarizə aparmağa çağırırıq!
