Fevral ayı ölkəmizin siyasi gündəliyi üçün olduqca gərgin və sıx qrafiklə müşayiət olunmaqdadır. Dövlət başçısının yalnız son iki həftədəki fəaliyyətinə nəzər salsaq, fevralın 2-də Birləşmiş Ərəb Əmirliklərinə işgüzar səfər, bu çərçivədə bir sıra vacib görüşlər və “Zayed İnsan Qardaşlığı Mükafatı”nın təqdim olunma mərasimində iştirak, fevralın 10-da Amerika Birləşmiş Ştatlarının vitse-prezidenti Cey.Di.Vensin ölkəmizə səfəri və bununla əlaqədar olaraq “Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası”nın imzalanması, mətbuata bəyanatların verilməsi, fevralın 13-də isə Münxen Təhlükəsizlik Konfransında iştirak etmək üçün birinci xanım Mehriban Əliyeva ilə birlikdə Almaniya Federativ Respublikasına səfər, burada aparılan vacib görüşlər, müsahibələr, panel çıxışları və digər tədbirlər nəzərdən keçirilə bilər. Son olaraq, fevralın 15-də Serbiya Respublikasına rəsmi səfər də həyata keçirilmişdir. Hər biri özlüyündə böyük əhəmiyyət kəsb edən bu hadisələr, Azərbaycanın artan beynəlxalq nüfuzunun əyani göstəricisidir. Xüsusilə, Serbiyaya edilən səfərə diqqət yetirmək istərdim.
Məlumdur ki, Serbiya ilə Azərbaycan arasında münasibətlər dinamik inkişaf edən və geniş perspektiv vəd edən əməkdaşlıq modelinə əsaslanır. Hazırda iki ölkə arasında diplomatik-siyasi, iqtisadi-ticari, enerji, nəqliyyat-kommunikasiya, hərbi təhlükəsizlik və mədəniyyət sahələrində əlaqələrin genişləndirilməsi istiqamətində ardıcıl və məqsədyönlü addımlar atılır. Həm regional, həm də beynəlxalq müstəvidə Azərbaycan və Serbiya qarşılıqlı dəstək və əməkdaşlıq nümayiş etdirərək qlobal sülhün və təhlükəsizliyin möhkəmləndirilməsinə mühüm töhfə verirlər. Bu baxımdan, dövlət başçısının 15 fevral tarixli Serbiya səfəri ikitərəfli münasibətlərin inkişafında xüsusi əhəmiyyət kəsb edir. Səfər çərçivəsində imzalanan sənədlər enerji, nəqliyyat, ticarət, mədəniyyət və təhsil sahələrində əməkdaşlığın daha da genişlənməsinə xidmət etməklə münasibətləri yeni, institusional mərhələyə yüksəldir. Azərbaycan üçün Serbiya Balkan regionunda mühüm tranzit qovşağı olmaqla Avropaya çıxış imkanlarının artırılması və enerji resurslarının şaxələndirilməsi baxımından strateji əhəmiyyət daşıyır.
Səfər çərçivəsində dövlətimizin başçısı Belqradda Azərbaycan ilə Serbiya arasında Strateji Tərəfdaşlıq Şurasının birinci iclasında iştirak etmiş, hər iki ölkənin lideri mətbuata bəyanatlarla çıxış etmişdir. Bəyanatlarda Azərbaycan–Serbiya münasibətlərinin dərin və çoxşaxəli xarakter daşıdığı, eləcə də iki dövlət başçısı arasında formalaşmış səmimi və qarşılıqlı etimada əsaslanan dostluq əlaqələrinin mövcudluğu xüsusi hiss olunmuşdur. Mətbuat konfransı zamanı Serbiya Respublikasının Prezidenti Aleksandar Vuçiç qeyd etmişdir ki, bizim elə əlaqələrimiz var ki, nə vaxt böhran baş versə, bir-birimizə açığıq və bir-birimizlə danışırıq. O, həmçinin bildirmişdir ki, bizim əməkdaşlığımız həyatın hər bir sahəsində inkişaf edir. Nəticə olaraq, yüksək səviyyəli qarşılıqlı etimadın nəticəsidir ki, 2012-ci illə müqayisədə iki ölkə arasında xidmətlər sahəsində ticarət dövriyyəsi 16 dəfə artmışdır. Strateji tərəfdaşlıq münasibətləri çərçivəsində Azərbaycan və Serbiya mümkün olan ən yüksək səviyyədə əməkdaşlıq əlaqələri qurmuşdur. Bu günədək iki ölkə arasında 57 sənəd imzalanmış, son səfər zamanı isə bu siyahıya yeni sənədlər əlavə edilmişdir. Mövcud dinamika və qarşılıqlı siyasi iradə nəzərə alındıqda, münasibətlərin gələcəkdə də yüksələn xətt üzrə inkişaf edəcəyi şübhə doğurmur.
Mətbuata bəyanatlarla çıxış edən Azərbaycan Prezidenti Dövlətçilik gününü qeyd edən Serbiyanın təbii sərvətləri olmayan bir ölkə olmağına baxmayaraq, iqtisadi cəhətdən uğurla inkişaf etdiyini, öz gücünə arxalandığını və heç bir yerdən yardım almadığını qeyd etdi. Həmçinin bildirildi ki, bizim gələcək üçün də açıq-aydın planlarımız var. Həm siyasi, həm iqtisadi, həm də energetika sahəsində əlaqələrimizi daha da gücləndirmək, beynəlxalq platformalarda, beynəlxalq təşkilatlar çərçivəsində bundan sonra da bir-birimizin ərazi bütövlüyünü və suverenliyini dəstəkləmək, birgə sərmayə layihələrini həyata keçirmək, energetika və nəqliyyat sahələrində yeni yaranmış imkanlardan yararlanaraq, daha irəliyə baxaraq çox güclü bir sinergiya yaratmaqdır.
Beləliklə, bu səfərin strateji dəyəri ondan ibarətdir ki, Azərbaycan Balkanlarda mövqeyini gücləndirir, Serbiya isə enerji və iqtisadi şaxələndirmə imkanları qazanır. Nəticədə münasibətlər qarşılıqlı faydalı tərəfdaşlıq səviyyəsinə yüksəlir və regional sabitlik, iqtisadi inkişaf, siyasi dəstək baxımından hər iki tərəf üçün xüsusi əhəmiyyət kəsb edir.
Arzu Abdullayev
İctimai-siyasi və humanitar məsələlər sektorunun müdiri
