ŞƏHİD ÇƏKMƏLƏRİ
Altında palçığı,
canında dərisi quruyub
Şəhid çəkmələrinin
Qolları yanına düşüb bağlarının
hələ də gözləyirlər o ayaqları
Bir şəhid anası
oğlunun çəkməsində gül əkib
Ordan alır oğlunun qoxusunu
Bir şəhid xanımı
Ərinin saatını taxıb qoluna
Hələ də gələcəyi vaxtı gözləyir
İlk görüşdükləri yerdə
İndi çox peşmandı
Əsgər ayağını sıxan çəkmələr
BELƏ DƏ GÖZÜMDƏN DÜŞƏ BİLƏRDİN
Toyunu bayrama bənzətdim, sağ ol,
Mən elə bildim ki, qorğa yeyilir.
Qamışdan mindiyim bu atın altda,
Ayağım nə gözəl yorğa yeriyir.
Nə bildin, elədin əldən gələni,
Sanki bilirdin ki, bunlar azımdı.
Belə də gözümdən düşə bilərdin,
Bu qədər nazilmək nəyə lazımdı?
Mənim sağlığıma bir mahnı çaldır,
Çox zildən olmasın, qoy bəmə düşsün.
Alnımdan nişan al eybi yox məni,
Qoy əlin titrəyib sinəmə düşsün.
Səni oynatmağa duxum çatmadı,
Ömrümdə bircə yol mən aciz oldum.
Məni bəyənmədin, sənin gözündə,
Bilirəm nə üçün çox ucuz oldum.
Təkəm, anam, təkəm…
Nə Anam bu dünyadadı
Nə də atam bu şəhərdə
Zəng vururam:
– Salam, ata!
Görürsən məni?
Burdayam anamın məzarı üstdə
Arada üç saatlıq təyyarə,
Üç günlük qatar yolu var
Qadınını itirmiş atamın
Siqaret tüstüsünün
Qoxusu gəlir burnuma
Darıxıram, ana, darıxıram.
Başımı dizinə qoymayan gündən
Başlayıb qulaq ağrılarım
Təkəm, anam, təkəm…
Allah məni taxtınacan
Yanaram od atəşində,
Sonunda külə düşərəm.
Dənə-dənə, salxım-salxım,
Qopulub gilə düşərəm.
Ömrü qovub, qatan adam.
Etdiyindən utan, adam.
Nərdivanı tutan adam,
Düşdüyümü bilə düşərəm.
Narahatıq baxtınacan,
Gözləyirik vaxtınacan.
Allah, məni taxtınacan,
Qaldırma, dilə düşərəm.
İTİR GETSİN BU EŞQİ
Mənsiz necə yatırsan?
Üşümürki kürəyin?
İndi uzaqda qalıb,
Yaxın olan gərəyin.
Mən deyim sənsiz necə?
Yuxu getmir gözümə.
Qaranlıqda gör necə,
Sükut çökür üzümə.
Sağ qolumun üstündə,
Daha saçlı o qız yox.
Bişirdiyim yeməyin,
Nə dadı, nə duzu yox.
Mən sənə yalvarmıram,
Bitir getsin bu eşqi.
Qaranlıqda iynətək,
İtir getsin bu eşqi.
