Xəbər verdiyimiz kimi, aprelin 3-də Lənkəran və Cəlilabad Dövlət Peşə Təhsil Mərkəzlərinə infotur təşkil olunub.
Mecra.az xəbər verir ki, infoturda elm və təhsil nazirinin müavini Kənan Kərimzadə, nazirliyin aidiyyəti struktur bölmələrinin əməkdaşları, Peşə Təhsili üzrə Dövlət Agentliyinin nümayəndələri, media qurumlarının rəhbərləri, təhsil mütəxəssisləri, jurnalist və blogerlər, eləcə də digər qonaqlar iştirak ediblər.
İnfoturda iştirak edən təhsil eksperti Məzahir Məmmədli Mecra.az-a açıqlamasında Peşə Təhsil Mərkəzlərində qurulan yeni infrastrukturla bağlı öz təəssüratlarını bölüşüb.
O, bildirib ki, ümumiyyətlə, Peşə Təhsil Mərkəzləri ilə bağlı cəmiyyətdə dolğun, aydın fikir yoxdur:
“Ona görə də bəzi valideynlər övladlarının 9-cu sinifdən çıxıb Peşə Tədris Mərkəzinə yönəlməsinə hələ bir qədər ciddi qəbul eləmirlər və yaxud da ki, ordan əmək bazarı üçün hansı səviyyəli mütəxəssis çıxmasına şübhə ilə yanaşırlar. Amma biz həm Lənkərana, həm də Cəlilabada olan səfərimiz vaxtı bütün bunları əyani şəkildə gördük. Peşə Təhsil Mərkəzləri kifayət qədər inkişaf edib, dövlətin böyük qayğısı var və orda xüsusi müşahidə olunan məsələ o idi ki, artıq bir neçə ixtisaslar üzrə hətta ali təhsil almış şəxslər belə həmin Peşə Təhsil Mərkəzlərində yenidən ixtisaslarını artırması ilə bağlı təşəbbüs göstərirlər. Bütün bunlar onun göstəricisidir ki, yaxşı ixtisas almaq üçün bakalavra görə gedib dörd il gözləməyə dəymir. Yəni artıq ümumtəhsil məktəblərində şagirdlər öz seçimini edə bilərlər. Bu, onların gələcəkdə əmək bazarına çıxışını asanlaşdırır və əlavə vaxt itkisindən azad edir.
Həm Lənkəran, həm də Cəlilabad Peşə Təhsil Mərkəzlərinə təşkil edilən infotur zamanı artıq əyani şəkildə biz tədrisin keyfiyyətini, labaratoriyalarını, yeni peşələrini, hətta kənd təsərrüfatına aid əyani işin təşkilini gördük.
Cəlilabad Peşə Təhsil Mərkəzində diqqətimi mərkəzin özünün mal ferması, kənd təsərrüfatı üçün texnikalar, onlardan istifadə və xüsusilə qızların o texnikaları idarə etməsi diqqətimizi çəkdi. Dual peşə təhsili də bizim diqqətimizi cəlb etdi. Məsələn, Bərdə və Qəbələ Peşə Təhsil Mərkəzlərində də həmin sadaladığımız yüksək keyfiyyət, tədris təmin olunub. O baxımdan düşünürəm ki, artıq valideynlər arasında o təbliğatı aparmağın zamanıdır ki, övladlarını Peşə Təhsil Mərkəzinə yönləndirməkdə əziyyət çəkməsinlər. Yəni ürəklə təklif etsinlər. Ordan yaxşı ixtisaslı mütəxəssis kimi çıxıb əmək bazarında özlərini işlə təmin etsinlər.
Lənkəran Peşə Təhsil Mərkəzində hibrit avtomobillərinin ustalarını hazırlamaq üçün peşəkarlardan ibarət ustalar cəlb ediblər və artıq onun da tədrisi ilə məşğuldurlar”.
Vasif ƏLİHÜSEYN
